ევროსაბჭოს საპარლამენტო ასამბლეის ზამთრის სესიის მეორე სამუშაო დღე ადამიანის უფლებათა ევროპული სასამართლოს გადაწყვეტილებათა აღსრულების საკითხებზე მსჯელობას დაეთმობა.

საქართველოს პარლამენტის პრესსამსახურის ინფორმაციით, საქართველოს საპარლამენტო დელეგაციის წევრები რუსეთის წინააღმდეგ მოგებულ დავაზე და მისთვის დაწესებულ ვალდებულებების აღსრულების საკითხზე ევროპელ კოლეგებთან იმსჯელებენ.

საპარლამენტო დელეგაციის ხელმძღვანელის, კახაბერ კუჭავას განცხადებით, მნიშვნელოვანია, რომ საქართველოს დელეგაციამ მოიპოვოს მხარდაჭერა, რათა უფრო ეფექტურად იქნეს აღსრულებული ის ვალდებულებები, რომლებიც რუსეთის ფედერაციას ევროპის სასამართლოს დააკისრა.

ევროპის საბჭოს საპარლამენტო ასამბლეის ზამთრის სესია გუშინ გაიხსნა. ევროპის საბჭოს საპარლამენტო ასამბლეამ საქართველოს 2020 წლის საპარლამენტო არჩევნების შესახებ ასამბლეის სადამკვირვებლო მისიის მიერ მომზადებული ანგარიში განიხილა, რომელიც მისიის ხელმძღვანელმა, ტინი კოქსმა წარადგინა. ანგარიშის მოსმენას საქართველოს საპარლამენტო დელეგაცია დაესწრო.

როგორც ტინი კოქსმა განაცხადა, საქართველოში ჩატარდა კონკურენტუნარიანი არჩევნები და მისი შედეგები ეჭქვეშ ვერ დადგება. სადამკვირვებლო მისიის ხელმძღვანელმა ქართულ ოპოზიციურ ძალებს მოუწოდა, შეუდგნენ სრულფასოვან საპარლამენტო საქმიანობას.

ინფორმაციას საქართველოს პარლამენტის პრესსამსახური ავრცელებს.