სსიპ ნინოწმინდის მუნიციპალიტეტის სოფელ დიდი გონდრიოს საჯარო სკოლამ 2020-2021 წლის სასწავლო წლის მეორე სემესტრი 18 იანვარს საკლასო ოთახებში განაახლა.

აღნიშნულის შესახებ GUARDIAN.GE-ის სკოლის დირექტორმა, ამაიაკ მიქაელიანმა (მაღლა ფოტოზე) განუცხადა.

„გასული წლის15 სექტემბერს ტრადიციულად დაწყებული სასწავლო პროცესის მეორე სემესტრი შეფერხების გარეშე, ჯანდაცვისა და განათლების, მეცნიერების, კულტურისა და სპორტის სამინისტროების რეკომენდაციების სრული დაცვით განახლდა 18 იანვარს.

„ამჟამად სკოლაში სასწავლო პროცესი სრულიად გამართულად მიმდინარეობს. სკოლა სათანადოდ არის აღჭურვილი ჰიგიენური საშუალებებით, დეზობარიერებით, ხსნარებით, პირბადეებით. შეიძლება ითქვას, რომ ყველა მიეჩვია იმ წესების დაცვას, რომელიც ქვეყანაშია დაწესებული.

„მოგეხსენებათ, გასული წლის ნოემბერი განსაკუთრებით რთული იყო. ვირუსი მასობრივად იყო მოდებული მთელ ქვეყანაში, მათ შორის ჩვენს მუნციპალიტეტში და ის პერიოდი ონლაინ სწავლებაზე მოგვიწია გადასვლა, თუმცა დეკემბრის დასაწყისში ისევ დავუბრუნდით საკლასო ოთახებს და პირველი სემესტრი ასე დავასრულეთ.

„ჩემი და სხვა პედაგოგების აზრითაც, ტრადიციული, პირისპირ, საკლასო ოთახებში სწავლების პროცესი გაცილებით ეფექტურია, ვიდრე ონლაინ სწავლება. საკლასო ოთახებში ბავშვები უკეთესად სწავლობენ და ცოცხალ გარემოში სწავლა მათაც და მასწავლებლებსაც უფრო მოსწონთ.

ამჟამად, როცა საქართველოში უკვე ეპიდემიოლოგიური კუთხით ვითარების სტაბილურობის ნიშნები ჩანს და ნინოწმინდის მუნციპალიტეტში კორონოვირუსის თითო ოროლა შემთხვევაღა თუ ფიქსირდება, ვიმედოვნებთ, რომ აღარ გახდება საჭირო ისევ დისტანციურ სწავლებაზე გადასვლა“, - უთხრა GUARDIAN.GE-ის დიდი გონდრიოს საჯარო სკოლის დირექტორმა, ამაიაკ მიქაელიანმა.