უშიშროების საბჭოს ყოფილი მდივანი გიგა ბოკერია იმ ძალებზე საუბრობს, რომლებიც მისი აზრით საქართველოს ევროინტეგრაციის პროცესს ეწინააღმდეგებიან. Newposts- თან ვრცელ ექსკლუზიურ ინტერვიუში მან განაცხადა, რომ "ივანიშვილი ისეთ ფუნდამენტალისტებს აძლიერებს, რომლებისთვისაც ევროპა და დასავლეთი ბოროტებაა".

როგორც ბოკერია მიიჩნევს, "ხშირად ეს ძალები რელიგიას ეფარებიან, ისინი ეკლესიაშიც არიან და მმართველ კოალიციაშიც. ასეთი ხალხი ივანიშვილმა საკუთარ კოალიციაში მიიღო, წინასაარჩევნოდ მათი თემებით და მხარდაჭერით სარგებლობდა. ისინი კი სხვადასხვა განწყობებზე თამაშობდნენ – ანტითურქულზე, ანტისომხურზე, რელიგიურ თუ სექსუალურ უმცირესობებზე".

– ბიძინა ივანიშვილმა პრესკონფერენციაზე განაცხადა, რომ ქვეყნის შიგნითაც არსებობენ ძალები, რომლებიც შეეცდებიან, ხელი შეუშალონ საქართველოს ევროპისკენ სვლას. თქვენ უშიშროების საბჭოს მდივანი იყავით, რა ძალებზე შეიძლება იყოს საუბარი?

– ჩემი აზრით, ეს ძალები ცნობილი არიან პოლიტიკურ სპექტრში. მათ შორის, როგორც უკვე ვთქვი, მმართველ კოალიციაში. გახსოვთ, მაგალითად, "ფორუმს" ჰქონდა კონცეფცია, რომ ნატოში აფხაზეთის ხარჯზე გვიღებენ. ეს კრემლში ჩამოყალიბებული ტიპური კონცეფციაა, რომ საზოგადოება შეაშინო და ის ნატოს წინააღმდეგ განაწყო. ახლა ეს ძალები კოალიციაში არიან და ხელისუფლებაში მოსვლის შემდეგაც არაერთი განცხადება გააკეთეს, თუნდაც თოფაძემ და სხვებმა. ასეთები არიან "ქართული ოცნების" წევრები, ჯაჭვლიანები და სხვებიც, რომლებიც პირდაპირ ლაპარაკობენ, – "ამერიკა არის ბოროტება" და მთლიანად იზიარებენ რელიგიურ-ფუნდამენტალისტურ, ქსენოფობიურ ღირებულებებს; ასეთები შესაძლოა არითმეტიკულად ქართული ოცნების ფრაქციაში უმრავლესობას წარმოადგენდნენ, უბრალოდ, ამ ეტაპზე "ბოლომდე ვერ შლიან ფრთებს" და იმედია ვერც მომავალში გაშლიან.

კოალიციის გარეთ, ყველაზე უფრო აქტიური ბურჯანაძე იყო. თუმცა, ის არ არის ერთადერთი. ეკლესიის წარმომადგენელთა მხრიდან არაერთხელ მოგვისმენია ისეთი განცხადებები, რომ იქ ძლიერი ანტიდასავლური, ანტილიბერალური განწყობილებები არსებობს. პრესკონფერენციაზე ივანიშვილმა გააკეთა განცხადება ეკლესიის თაობაზე. ამ განცხადებას მთლიანად ვეთანხმები, მაგრამ არ დაგვავიწყდეს, რომ ეს არის კაცი, რომელმაც ამავე დროს არაერთხელ თქვა: "ასავალ-დასავალი" ჩემი საყვარელი გაზეთიაო.

ივანიშვილი ისეთ ფუნდამენტალისტებს აძლიერებს, რომლებისთვისაც ევროპა და დასავლეთი ბოროტებაა, რომლებიც იგონებენ რაღაც შეთქმულებებს, ჩვენზე ამბობენ, "ქართველის ახალი ჯიშები გამოგვყავს და ასე შემდეგ. ხშირად ეს ძალები რელიგიას ეფარებიან, ისინი ეკლესიაშიც არიან და მმართველ კოალიციაშიც. ასეთი ხალხი ივანიშვილმა საკუთარ კოალიციაში მიიღო, წინასაარჩევნოდ მათი თემებით და მხარდაჭერით სარგებლობდა. ისინი კი სხვადასხვა განწყობებზე თამაშობდნენ – ანტითურქულზე, ანტისომხურზე, რელიგიურ თუ სექსუალურ უმცირესობებზე...

გამარჯვების შემდეგ მათი ლიდერები ციხიდან პოლიტპატიმრებად და გმირებად გამოუშვეს. ისინი შსს-თან კოორდინირებულად და დაუსჯელად სჩადიოდნენ ძალადობას "ნაციონალური მოძრაობის" წინააღმდეგ და სწორედ მათ მოაწყვეს 17 მაისის სამარცხვინო დარბევა. საკომიტეტო მოსმენისას პარლამენტში კარგად გამოჩნდა რამდენი მხარდამჭერი ჰყავს ამ სამარცხვინო მოძალადეებს "ქართული ოცნების" დეპუტატებს შორის. "ქართული ოცნების" აქტივისტები რეგიონებში სწორედ ასეთი განწყობილებების მატარებლები არიან და ზოგიერთი მათგანი საჯაროდ ამართლებდა ძალადობას მუსლიმების წინააღმდეგ.

თუ ახლა მიხვდა, რომ ასეთი რაღაცები არ უნდა გააკეთოს, ეს ცუდი არ არის. თუმცა, დარწმუნებული არ ვარ.

იმიტომ რომ სხვა მიმართულებით ძველ კურსს აგრძელებს, მაგალითად, მსხვერპლად გამოჰყავთ ისინი, ვინც კონსტიტუციური წყობის დამხობას აპირებდა და დამნაშავეებად რაცხავენ მათ, ვინც მაშინ ეს არ დაუშვა...

ივანიშვილმა სამიზნედ ამოირჩია პროდასავლური ოპოზიციური ძალა და მუდმივად მის განადგურებას ცდილობს.

ინტერვიუს სრული ვერსია იხილეთ ბმულზე: http://www.newposts.ge/?l=G&id=31047-ექსკლუზიური%2C+გიგა%2C+ბოკერია