„ქართული ოცნების“ დეპუტატმა, პარლამენტის განათლების, მეცნიერებისა და კულტურის კომიტეტის თავმჯდომარის მოადგილემ, შალვა პაპუაშვილმა განაცხადა, რომ საპარლამენტო უმრავლესობასა და პარტია „მოქალაქეებს“ შორის გაფორმებული მემორანდუმი ცესკოს თავმჯდომარის შეცვლას არ ითვალისწინებს. როგორც მასნ თქვა, მოლაპარაკებების ფარგლებში ხდება შეთანხმება სისტემაზე და არა კონკრეტულ ადამიანებზე.

„რაც შეეხება ცესკოს თავმჯდომარეს, ის არის გარკვეული ვადით არჩეული, ამიტომ ეს არ არის ამ მემორანდუმის განხილვის საკითხი. მთავარი მოთხოვნა არ შეიძლება იყოს პიროვნებები. მთავარი მოთხოვნა შეეხება პროცედურებს და სისტემას და ამაზე უნდა ვკონცენტრირდეთ და სწორედ ამაზე იყო კონცენტრირებული მათ შორის მოლაპარაკების პროცესი. სწორედ ამიტომ, პიროვნებები და პიროვნული საკითხები არ არის მემორანდუმის ნაწილი“, - განაცხადა პაპუაშვილმა და დაამატა, რომ ბოლო თვეების განმავლობაში ცესკოს მიმართ არაერთი პრეტენზია გაჟღერდა, თუმცა აღმოჩნდა, რომ ყველაფერი ტყუილი იყო.

პარტია „მოქალაქეების“ თავმჯდომარე ალეკო ელისაშვილი კი საპირისპიროს აცხადებს და ამბობს, რომ მემორანდუმის მიხედვით, რომელიც „ქართულ ოცნებასა“ და „მოქალაქეებს“ შორის გაფორმდა, ცესკო-ს თავმჯდომარე თამარ ჟვანია ვეღარ იქნება.