წელიწადზე მეტია, უკვე ეს კითხვები ისმის, როდის მიდიხართ? დღეს, ხვალ, გუშინ უკვე ხომ არ წახვედით, ჯერ მოვდივარ ხომ ხედავთ, – განაცხადა საქართველოს პრემიერ-მინისტრმა, გიორგი გახარიამ პოსტიდან მისი შესაძლო წასვლის შესახებ კომენტირებისას და აღნიშნა, რომ გუნდიდან სრულ მხარდაჭერას გრძნობს.

„ეს არის ჩვეულებრივი ჭორები, რომელიც უკვე გახდა მომაბეზრებელი. რაღაც უფრო საინტერესო, შინაარსობრივ თემებზე ხომ შეიძლება, ვისაუბროთ. ხომ არ შეიძლება, წელიწად-ნახევრის განმავლობაში, ჟურნალისტებთან რამდენჯერ დავდგები, კითხვა იყოს, როდის მიდიხართ ან როდის გადადგებით?! უკვე იუმორის ნაწილი გახდა ეს ყველაფერი“, – განაცხადა გახარიამ და დაამატა:

„ვგრძნობ სრულ მხარდაჭერას ჩემი გუნდის მხრიდან და ეს მხარდაჭერა მაძლევს იმ ძალას, რომ ვიყო ეფექტური, რათა პრობლემები გადავწყვიტო. თქვენ შეიძლება, ეს გეჩვენებათ, მე ამას ვერ ვგრძნობ. მე ამას აღვიქვამ როგორც ჭორაობად. ვგრძნობ და მაქვს სრული მხარდაჭერა ჩემი გუნდის ისევე, როგორც ირაკლი კობახიძეს, როგორც პარტიის თავმჯდომარეს აქვს სრული მხარდაჭერა ჩემი მხრიდან და აღმასრულებელი ხელისუფლების მხრიდან“.

გახარიამ რეგულაციების დარღვევის საკითხზე „ნაციონალური მოძრაობის“ წარმომადგენლებისა და მიხეილ სააკაშვილის განცხადებების შესახებაც გააკეთა კომენტარი და ამას პოლიტიკური ხულიგნობა უწოდა.

„მე ამას ვაფასებ, როგორც პოლიტიკურ ხულიგნობას, მეტს არაფერს. როდესაც ადამიანებს პოლიტიკური, ნორმალური კონტენტის შექმნა არ შეუძლიათ, შინაარსობრივ დებატში შემოსვლა არ შეუძლიათ, ისინი უბრალოდ პოლიტიკურად ხულიგნობენ. ვიღაც ხულიგნობს აქ, საქართველოში, ვიღაც პოლიტიკურად ხულიგნობს ქვეყნის გარედან, ამას რა მნიშვნელობა აქვს?!“ – განაცხადა გახარიამ.

მისი თქმით, მოქალაქეებმა ძალიან კარგად იციან, ვინ ზრუნავს მათზე.

„ჩვენი მოქალაქეები ამას ყველაფერს ხედავენ და აფასებენ. ჩვენმა მოქალაქეებმა ძალიან კარგად იციან, ვინ ზრუნავს მათზე და რას ნიშნავს ადამიანებზე ზრუნვა. ეს ყველაფერი არჩევნებშიც აისახა. ხომ ნახეთ, პოლიტიკური პარტიები, რომლებსაც ამბიციები ჰქონდათ უზარმაზარი, ორ და სამ პროცენტს ძლივს აცდნენ. ამიტომ, აქ ყველაზე დიდი პრობლემა არის ის, რომ დროს ვკარგავთ.

ეს პოლარიზაცია, რომელიც დღეს პოლიტიკურ ველზეა, სამწუხაროდ, ხდება ქვეყნის მომავლისა და უსაფრთხოების პრობლემა. ყველამ ნება უნდა იბოძოს, გაიაზროს პასუხისმგებლობა. იმდენი ტვინი თუ არ აქვს, რომ ეს პასუხისმგებლობა გაიაზროს, მოქალაქეებს მაინც მიაქციოს ყურადღება, რომლებმაც მას ხმა მისცეს და ნება იბოძოს, შევიდეს და იყოს იქ, სადაც პოლიტიკა კეთდება და არა ქუჩაში“, – განაცხადა გახარიამ.