„ერთიანი ნაციონალური მოძრაობის“ თავმჯდომარე ნიკა მელია აცხადებს, რომ „ქართულ ოცნებას“ და „მურუსიძეებს და ჩინჩალაძეებს“ მისი დაჭერი თავი არ აქვთ და მას იმიტომ ვერ დაიჭერენ, რომ „არანაირი საფუძველი არ არსებობს სამართლებრივი“.

„ივანიშვილის გუნდის დეპუტატებს მივმართავ განსაკუთრებით და მურუსიძეებს და ჩინჩალაძეებს. ხომ იძახეს თქვენმა პოლიტიკურმა ლიდერებმა, რომ მელია გირაოს გადაიხდის, გადაიხდის, გადაიხდის, დაზუთხულივით, აი, 3-4 დღე ხომ ამაზე საუბრობდა კალაძე, კობახიძე, თალაკვაძე, გახარია, ყველა, ყველა, ყველა, ღარიბაშვილი და ა.შ. ხომ არ გადავიხადე გირაო? ვთქვი, რომ არ გადავიხდი გირაოს და ვერ დამიჭერთ. ანუ ვინ აღმოჩნდა მართალი, მე თუ თქვენი პოლიტიკური ლიდერები „ქართულ ოცნებაში“? - მე. ამიტომ, ახლა როდესაც ვამბობ, რომ ვერ დამიჭერთ, ვის უნდა დაუჯეროთ? თქვენს პოლიტიკურ ლიდერებს კი არ უნდა დაუჯეროთ, უნდა დაუჯეროთ მელიას. მელიას იცით, რატომ ვერ დაიჭერენ? იმიტომ, რომ არანაირი საფუძველი არ არსებობს სამართლებრივი და კობახიძე-გავრილოვი-მურუსიძე-კალაძის დასაჭერი ნამდვილად არა ვარ და ვერ დამიჭერენ. ძალიან მიკვირს, რატომ ბაქიბუქობენ იმ საკითხზე, რისი თავიც არ აქვთ. გეუბნებით სრული პასუხისმგებლობით, ამის თავი არ აქვთ და ვერ დამიჭერენ“, განაცხადა ნიკა მელიამ.