შალვა ნათელაშვილი რომ არ იყოს, მუქარა ძალიან ცუდია-თქო ვიტყოდი და შევაფასებდი, მაგრამ შალვა ნათელაშვილის განცხადებას სერიოზულად არ შევაფასებ, – აღნიშნა ფრაქცია „ქართული ოცნების“ თავმჯდომარე მამუკა მდინარაძემ „ლეიბორისტების“ ლიდერის განცხადების კომენტირებისას.

„ლეიბორისტული პარტიის“ თავმჯდომარემ, შალვა ნათელაშვილმა პარლამენტში კენჭისყრის გამართვამდე „ქართული ოცნების“ დეპუტატები გააფრთხილა, რომ თუკი ისინი ნიკა მელიასთვის იმუნიტეტის მოხსნას დაუჭერდნენ მხარს, ყველას თავისი ხელით „შეყრიდა ციხეში“.

მდინარაძის თქმით, „ნაციონალური მოძრაობა“ და მისი კლასტერი ნათელაშვილმა „შალვას ფანჩატურის ოპოზიციად გადააქცია“.

„ამ ადამიანს არ უნდა დავუკარგოთ, მაინც ძლიერი პოლიტიკოსი აღმოჩნდა, რადგან მთელი „ნაციონალური მოძრაობა“ და მისი კლასტერი შალვას ფანჩატურის ოპოზიციად გადააქცია. ეს შეძლო, ეს უნდა დავუფასოთ და ვუთხრათ, საკმაოდ ძლიერი აღმოჩნდა მისი ბეგრაუნდის მიუხედავად.

რაც შეეხება ე.წ. მილიონერ დეპუტატებს, მართლაც არიან ძალიან შეძლებული. რამდენიმე ადამიანია, რომელსაც პოლიტიკური საქმიანობის დროს არ შეუძენია არაფერი და თავისი ქონებისთვის არ დაუმატებიათ. იყვნენ ძალიან წარმატებულები და „ნაცების“ ტელევიზიები ხალხს მათი ქონების ჩვენებით აბრაზებენ, მაგრამ ამ ადამიანებმა თავისი შრომით შეძლეს გარკვეული ქონების დაგროვება. პარლამენტში შემოსვლით მატერიალური სარგებელი არ მიუღიათ“, – განაცხადა მდინარაძემ.