„დაინახეთ, რომ კარები ჩაგვიკეტეს და არ შეგვიშვეს. აღსრულების პროცესში გათვალისწინებული და გამოყენებული იქნება ყველა კანონით გათვალისწინებული საშუალება“, განაცხადა „ნაციონალური მოძრაობის“ ცენტრალურ ოფისთან მისულმა შსს-ს წარმოამდგენელმა მედიასთან საუბრისას.

„როგორც მოგეხსენებათ, სასამართლოს მიერ გაცემულია შესაბამისი გადაწყვეტილება, რომლის შესრულებაც დაევალა შინაგან საქმეთა სამინისტროს, შესაბამისად, გამომძიებლები მოვედით ოფისში - ვინაიდან ცნობილია ჩვენთვის, რომ პატივცემული ნიკანორ მელია იმყოფება აღნიშნულ ოფისში - განჩინების აღსრულების მიზნით, თუმცა თქვენ იცით, დაინახეთ, რომ კარები ჩაგვიკეტეს და არ შეგვიშვეს. აღსრულების პროცესში გათვალისწინებული და გამოყენებული იქნება ყველა კანონით გათვალისწინებული საშუალება“, განაცხადა შსს-ს წარმოამდგენელმა მედიასთან საუბრისას.

ცოტა ხნის წინ შინაგან საქმეთა სამინისტრო ნიკა მელიას განჩინების აღსრულებასთან დაკავშირებით განცხადება გაავრცელა და მოუწოდებს პოლიტიკური პარტიის წარმომადგენლებს, ასევე, მათ მხარდამჭერებს პროტესტი გამოხატონ მშვიდობიანი ფორმით, თავი შეიკავონ ძალადობრივი ქმედებებისგან და ხელი არ შეუშალონ პოლიციის წარმომადგენლებს სასამართლოს გადაწყვეტილების აღსრულებაში.

„ნაციონალური მოძრაობის“ ცენტრალურ ოფისთან შსს-ს წარმომადგენლები მივიდნენ და შეეცადნენ მელიასთვის სასამართლოს განჩინება ჩაებარებინათ. იქ შეკრებილებმა სამართალდამცველებს შენობაში შესვლის საშუალება არ მისცეს. ადვოკატი ბექა ბასილაია ითხოვდა, რომ განჩინება მისთვის ჩაებარებინათ, თუმც ამაზე მას უარი ეთქვა.

„ნაციონალური მოძრაობის“ თავმჯდომარე ნიკა მელია მთელი ღამის განმავლობაში, ოპოზიციის სხვა ლიდერებთან ერთად პარტიის ოფისში იმყოფებოდა.