პარლამენტის თავმჯდომარის მოადგილის, „ქართული ოცნების“ საბურთალოს მაჟორიტარი დეპუტატი, დავით სერგეენკოს განცხადებით, ოპოზიციასთან მოლაპარაკების კარი არ დახურულა და მმართველი გუნდი ამისთვის ყოველთვის მზადაა, თუმცა რიგგარეშე არჩევნების დანიშვნა არ განიხილება, გარდა იმ შემთხვევისა, თუ პარლამენტის საგამოძიებო კომისიამ გაყალბება დაადასტურა.

„რაც შეეხება მოლაპარაკებას, ამისთვის მზადყოფნა სულ არის, მოლაპარაკებების კარი არ დახურულა. რა თქმა უნდა, მოლაპარაკებას ალტერნატივა არ აქვს. თუ ოპოზიციისთვის გახარიას გადადგომა იმდენად დიდი მნიშვნელობის საკითხია, რომ ამის გამო გამოხატავენ მზადყოფნას მოლაპარაკების პროცესის განახლებისთვის, ამ ნაბიჯს მივესალმები, რადგან გულწრფელად მჯერა, რომ მოლაპარაკებას ალტერნატივა არ აქვს.

„რიგგარეშე არჩევნები არ განიხილება გარდა იმ შემთხვევისა, თუ პოზიციისა და ოპოზიციის კომისიის ერთობლივი მუშაობის შედეგად, უტყუარად არ დადგინდა, რომ რეალურად ჰქონდა გაყალბებას ადგილი. არასაკმარისია არსებული მოცემულობა, რომ ასე უბრალოდ გადავწყვიტოთ არჩევნები. ასეთ ფორმატში ამ საკითხის განხილვა ისევ რჩება წითელ ხაზს მიღმა. მართალია, შედარებით კლებადი ოპტიმიზმით ახლაც მაქვს მოლოდინი, რომ მიიღწევა ისეთი კონსენსუსი, რომლითაც ოპოზიციური პარტიის მეტ წარმომადგენელს შეეძლება, გამოიყენოს პოლიტიკური ტრიბუნა პოლიტიკური დებატებისთვის“, – განაცხადა დავით სერგეენკომ.

მას სჯერა, რომ პრემიერ-მინისტრის თანამდებობაზე შერჩეული იქნება ღირსეული კანდიდატი, რომელიც რთულ გამოწვევებთან გამკლავებას შეძლებს.

„ერთია პროცედურული ნაწილი, რომელიც ამბობს, რომ ცხრა დღეში მმართველ პარტიას უნდა მიეწოდოს წინადადებები და გაიაროს კონსულტაციები პრემიერ-მინისტრობისა და მინისტრების ახალ კანდიდატებზე, მეორე მხრივ, არის პოლიტიკური კონსულტაციები, თუ რომელი კანდიდატი იქნება საუკეთესო. ჩემი ბოლო წლების სამსახურიდან გამომდინარე, რა თქმა უნდა, ბევრ მათგანს ვიცნობ, მაგრამ გულწრფელად რომ გითხრათ, თითოეული მათგანი მეცოდება იმ მძიმე ტვირთისთვის, რაც დღევანდელ სიტუაციაში აღმასრულებელი ხელისუფლების მართვას ნიშნავს, მაგრამ მჯერა, შერჩეული კანდიდატი იქნება ყველაზე უფრო ღირსეული და ამ რთულ გამოწვევებთან გამკლავებას შეძლებს.

საზოგადოების ინტერესი, თუ ვინ იქნება აღმასრულებელი ხელისუფლების ხელმძღვანელი, ლეგიტიმურია, თუმცა ჩემი მხრიდან არ იქნება სწორი ალბათობაზე საუბარი“, – განაცხადა დავით სერგეენკომ.