საქართველოს პარლამენტის საგარეო ურთიერთობების კომიტეტის თავმჯდომარემ, ნიკოლოზ სამხარაძემ განაცხადა, რომ უცხოელი დიპლომატების - აშშ-ისა და ევროკავშირის ელჩების შუამავლობით ოპოზიციასა და ხელისუფლებას შორის მოლაპარაკებები მალე განახლდება.

„ამერიკა და ევროკავშირი ისევ თავის ადგილზე არიან. ისინი გააგრძელებენ ფასილიტაციას. თუ ოპოზიციიდან მოდის დიალოგთან დაკავშირებით გზავნილი, ეს არის ძალიან კარგი. თუ ისინი არიან დიალოგისთვის მზად, ესე იგი ნიშნავს, რომ მეხუთე რაუნდი ძალიან მალე ჩაინიშნება“, განაცხადა ნიკოლოზ სამხარაძემ.

„ერთიანი ნაციონალური მოძრაობის“ თავმჯდომარემ, ნიკა მელიამ ლიეტუვის სეიმის საგარეო საკითხთა კომიტეტის თავმჯდომარე ჟიგიმანტას პავილიონისთან შეხვედრის შემდეგ ოპოზიციის სახელით პროცესის დეესკალაციისა და დიალოგის მზადყოფნა უკვე გამოხატა და თქვა, რომ ამისთვის ყველაფერი გაკეთდება, თუმცა დააკონკრეტა, რომ დიალოგი უნდა იყოს შედეგზე ორიენტირებული და „არა დიალოგი დიალოგისთვის“.