ჩვენი პოლიტიკური პოზიციები შეიძლება, ვერასდროს დაუახლოვდეს ერთმანეთს და ღმერთმა დაიფაროს, დაუახლოვდეს მათ [„ნაციონალური მოძრაობის“] პოზიციებს, მაგრამ ჯანსაღი ოპონირება, სამუშაო რეჟიმში დისკუსია იმედი მაქვს, დაგვეხმარება მათ დახვეწაში, – განაცხადა საქართველოს პრემიერ-მინისტრობის კანდიდატმა, ირაკლი ღარიბაშვილმა პარლამენტში, ფრაქცია „ქართული ოცნების“ წევრების წინაშე სიტყვით გამოსვლისას.

მან „ნაციონალურ მოძრაობას“ და მასთან გაერთიანებულ ძალებს „ოპოზიციად წოდებული დესტრუქციული ძალა“ და მათ ქმედებას „მიზანმიმართული საბოტაჟი“ უწოდა „ჩვენი სახელმწიფოს წინააღმდეგ“.

„ის, რაც ხდება დღევანდელ პარლამენტში, არის აბსოლუტურად მიუღებელი. ფაქტი, რომ დღეს ჩვენი ოპოზიციად წოდებული დესტრუქციული ძალა არ შემოდის საქართველოს პარლამენტში, არის აბსოლუტურად მიზანმიმართული საბოტაჟი ჩვენი სახელმწიფოს წინააღმდეგ. მინდა, მათ მივმართო. ვიცი, რომ არ შეიძლება, არსებობდეს იმაზე მეტი საფუძველი კონსენსუსისთვის, ვიდრე ჩვენი ქვეყნის მომავალია. ჩვენი პოლიტიკური პოზიციები შეიძლება, ვერასდროს დაუახლოვდეს ერთმანეთს და ღმერთმა დაიფაროს, დაუახლოვდეს მათ პოზიციებს, მაგრამ ჯანსაღი ოპონირება, სამუშაო რეჟიმში დისკუსია იმედი მაქვს, დაგვეხმარება მათ დახვეწაში. მერწმუნეთ, რომ ხალხს ნაკლებად აინტერესებს მაგალითად, საარჩევნო კოდექსის რაღაც გარკვეული დეტალები, თუ რა გზით მოხვდებიან ადამიანები პარლამენტში, თუკი ამ შენობიდან, ტრიბუნიდან არ ისმის მათი სათქმელი“, განაცხადა ღარიბაშვილმა.

მან ასევე თქვა, რომ დესტრუქციულ ძალებს, რომლებიც „თავიანთი პარტიული ტელევიზიების პროპაგანდით საინფორმაციო-ფსიქოლოგიურ დესტრუქციულ კამპანიას“ ეწევა, „ამ შესაძლებლობასაც გამოვართმევთ ხელიდან“, სიმართლის დაპირისპირებით.

მინდა, ასევე ვთქვა, ჩვენი ხალხის დაკვეთა არის მათი რეალური, კონკრეტული პრობლემების გადაწყვეტა. ახლა გვჭირდება ერთიანობა და არა პოლიტიკური პროგრამის, არამედ საზოგადოების, ჩვენი ხალხის ინტერესების გარშემო გაერთიანება. რაც ხდება დესტრუქციული ოპოზიციის მხრიდან, საინფორმაციო-ფსიქოლოგიურ დესტრუქციულ კამპანიას ვგულისხმობ, თავიანთი პარტიული ტელევიზიების პროპაგანდით, შეიძლება, ცოტა ხნით მოატყუო ადამიანები, ნათქვამია, რომ მრავალგზის განმეორებული სიცრუე ხანდახან ხდება სიმართლე, მაგრამ ჩვენ კარგად გვესმის, რომ ამ შესაძლებლობასაც გამოვართმევთ ხელიდან, ვინაიდან ჩვენ ამ ყველა სიცრუეს დავუპირისპირებთ სიმართლეს. თუ ოპოზიციის ჯანსაღ ნაწილს ეყოფა ძალა და გამბედაობა, გონიერება და სახელმწიფოებრივი აზროვნება ასეთი შრომისთვის, მე ამას მხოლოდ მივესალმები, ჩვენი გუნდი მიესალმება მათთან დიალოგს. რა თქმა უნდა, არ ვგულისხმობ იმ რადიკალურ ფრთას, რომელიც პირდაპირ სახელმწიფოს დისკრედიტაციასა და სახელმწიფო ინსტიტუტების ნგრევას ცდილობს“, –განაცხადა ღარიბაშვილმა.