„ნაციონალური მოძრაობის“ თავმჯდომარის, ნიკა მელიას დაკავებას „ევროპული საქართველოს“ გენერალური მდივანი გიგი უგულავა გამოეხმაურა და თქვა, რომ ოპოზიცია შემდგომი მოქმედებების გეგმას მხარდამჭერებს თბილისში, სახელმწიფო კანცელარიასთან 3 საათზე გააცნობს.

„ციხე ადამიანს აძლიერებს. ნიკა მელიამ მოგვცა ბრძოლის მაგალითი. ის მშვიდი იყო და იყო მტკიცე. ჩვენი ვალია, რომ დროშა არ დაეცეს ძირს, ჩვენი ვალია, რომ ბრძოლა უნდა გაგრძელდეს. დღეს 23 თებერვალია, საბჭოთა ჯარის დღე და ამ როდიონოვმა, ივანიშვილმა და მისმა ცახესმა, დაამყარეს საბჭოთა დიქტატურა. ის, რაც დღეს აქ მოხდა, არის სამარცხვინოზე სამარცხვინო ლაქა ჩვენი ქვეყნის ისტორიაში და ეს ლაქა დიდი ხანი იქნება ჩამოურეცხავი. ჩვენ ვიკრიბებით დღეს 3 საათზე კანცელარიასთან, გამოვაცხადებთ შემდეგი ბრძოლის მეთოდებს და მე პირადად, ძალიან ბევრ ადამიანთან ერთად, ვპირდები ივანიშვილს, რომ დღევანდელი დღე მისთვის იქნება წყალგამყოფი დღე - დღევანდელ დღეს მან საკუთარ თავს დაუსვა წერტილი. ის ამ ქვეყანაში ვეღარ იცხოვრებს. მისი ადგილი ამ ქვეყანაში აღარ იქნება. ის, რაც მან გააკეთა, ასეთი რამეები უპატიებელი არ დარჩება“, განაცხადა გიგი უგულავამ.