„ევროპული საქართველოს“ თავმჯდომარე დავით ბაქრაძე, რომელიც ევროკავშირის ელჩის რეზიდენციაში შეხვედრაზე მივიდა, აცხადებს, რომ ხელისუფლებამ ქვეყანა მიიყვანა დაპირისპირების, უფსკრულის პირას და შეიქმნა საფრთხე, რომ საქართველო აღარ იქნება დასავლეთის პარტნიორი.

„ჩვენ ყველას – ოპოზიციასაც და ელჩებსაც გვაწუხებს საერთო პრობლემა, როგორ დავშორდეთ დაპირისპირების იმ უფსკრულს, რომლის წინაშეც ყველა დაგვაყენა „ქართულმა ოცნებამ“, როგორ მოვიცქეთ ისე, რომ ამ ქვეყნის ევროპულ და დასავლურ მომავალს საფრთხე არ შეექმნას დღევანდელი ხელისუფლების სკამების ჩაბღაუჭების და სახელისუფლო ამბიციების გამო. ამიტომ ვართ მოსული, ეს გვაწუხებს. მოსული ვართ იმიტომ, რომ მოვძებნოთ გამოსავალი იმ პოლიტიკური ჩიხიდან, რომელშიც ყველა ერთად შეგვიყვანა „ქართულმა ოცნებამ“, მოვძებნოთ გამოსავალი, რომელიც ააშორებს ქვეყანას დაპირისპირებას, ააშორებს ჩვენი დასავლური მომავლის დაკარგვას და უზრუნველყოფს, რომ საქართველო კვლავ დარჩეს აშშ-ის და ევროკავშირის ღირებულ პარტნიორად, რასაც დიდ საფრთხეს უქმნის დღევანდელი ხელისუფლების ნაბიჯები. იმედი მაქვს, პარტნიორებთან ერთად მოვახერხებთ „ქართული ოცნების“ სიჯიუტის, მათი სახელისუფლო, მანიაკალური ამბიციების მოთოკვას“, განაცხადა დავით ბაქრაძემ.