საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე მიიჩნევს, რომ „ნაციონალური მოძრაობის“ ლიდერის, ნიკა მელიას დაპატიმრებაზე საერთაშორისო გამოხმაურებები საკმაოდ მოზომილი და რბილია.

როგორც სამხარაძემ აღნიშნა, გამომდინარე იქიდან, რომ ოპოზიციური პარტიის ლიდერი აღმოჩნდა ციხეში, ეს ყველა ქვეყანაში შეშფოთების საფუძველი იქნება, თუმცა აღსანიშნავია, რომ ოპოზიციური პარტიების ლიდერები სხვა განვითარებულ ქვეყნებში ისე არ იქცევიან, როგორც საქართველოში.

„კრიტიკა მოსალოდნელი იყო და ნაწილობრივ ჩვენთვის მისაღებიც კი შეიძლება იყოს, თუმცა ოპოზიციური პარტიების ლიდერები ასე რომ არ იქცეოდნენ, ასე უხეშად და თავხედურად რომ არ იწვევდნენ კანონს, საზოგადოებას და სახელმწიფოს, ამისთვის საჭიროა დიალოგი, კონსტრუქციულობა და ამომრჩევლის ნების გათვალისწინება“, განაცხადა ნიკოლოზ სამხარაძემ.