„ლეიბორისტული პარტიის“ თავმჯდომარე შალვა ნათელაშვილი აცხადებს, რომ საქართველოს ოკუპაციიდან 100 წლის თავზე ერდოღანი და რუსეთი ერთად იყოფენ სამხრეთ კავკასიას და „ისე რთულად მიდის საქმეები, რომ ჩვენ შეიძლება დაგვჭირდეს ამერიკული სამხედრო ბაზის გახსნა აქ“. „ამერიკულ სამხედრო ბაზას ივანიშვილი გაგვიხსნის? ხომ აორთქლდა იმ წუთში პუტინისგან“, თქვა ნათელაშვილმა „ტვ პირველის“ ეთერში.

„100 წელი შესრულდა ოკუპაციიდან, როდესაც ჩვენ დავკარგეთ დამოუკიდებლობა და ეს ოკუპაცია იყო არა მარტო რუსეთის მიერ, თურქეთის მიერ. ათათურქი და რუსეთი ერთად მოქმედებდნენ, გაიყვეს საქართველო, დავკარგეთ ტაო-კლარჯეთი, დავკარგეთ საინგილო, ჰერეთი, დავკარგეთ ყარიას ველები, აი, ის გარეჯიც, სწორედ მაშინ ჩაისახა ამის დაკარგვა და ყველაფერი და 100 წლის შემდეგ, რაღაც საოცარი კანონზომიერებები აქვს ისტორიას - ისევ, რუსეთი და თურქეთი ერთად არიან, ერდოღანი და რუსეთი ერთად იყოფენ ამიერკავკასიას, აზერბაიჯანში ერთობლივი პატრულირება და კომენდანტის პუნქტები აქვთ გახსნილი, სომხეთში უკვე პუტინი გამაგრდა მთლიანად. გეოპოლიტიკური გამოწვევა დაისახა ახალი, როდესაც სატრანზიტო გზების გავლა ჩვენს გარეშე სომხეთის ტერიტორიაზე ნახიჩევანის გარეშე განხორციელდება. თუ ჩვენ დროზე არ შევცვალეთ ხელისუფლება, არ დავუბრუნდით ვექტორს განვითარების, ვექტორს სწორი სტრატეგიის, არ მოვიცილეთ, არ მოვიცილეთ ეს პუტინიზმი ჩვენს პოლიტიკაში და არ გავშალეთ მხრები ფართოდ და არ მოგვეცა საშუალება, ბოლოს და ბოლოს, ისე რთულად მიდის საქმეები, რომ ჩვენ შეიძლება დაგვჭირდეს ამერიკული სამხედრო ბაზის გახსნა აქ. ამერიკულ სამხედრო ბაზას ივანიშვილი გაგვიხსნის? ხომ აორთქლდა იმ წუთში პუტინისგან“, განაცხადა შალვა ნათელაშვილმა.