„ნაციონალური მოძრაობა“ და სხვა ოპოზიციური პარტიები, მხარდამჭერებთან ერთად, თბილისში აქციას მართავენ, სახელწოდებით - „მარში თავისუფლებისათვის“.

ისინი ამ წუთებში ფილარმონიის მიმდებარე ტერიტორიიდან პარლამენტის შენობისკენ მიემართებიან.

აქციის მონაწილეები მოითხოვენ ნიკა მელიას გათავისუფლებას და ვადამდელი საპარლამენტო არჩევნების დანიშვნას.

„ნაციონალური მოძრაობის“ წევრმა, ლევან ხაბეიშვილმა განაცხადა, რომ მთელმა მსოფლიომ დაინახა საქართველოში არსებული დიქტატორული რეჟიმი.

„უნდა ვაჩვენოთ მთელ მსოფლიოს, რომ არ ვართ ხალხი, რომლებიც შევეგუებით მონობას. ჩვენ ვართ თავისუფლების მოყვარე, ღირსეული ერი, რომელიც თვის სიტყვას აუცილებლად იტყვის“, – განაცხადა ხაბეიშვილმა.

სალომე სამადაშვილმა კი განაცხადა, რომ „ქართულ ოცნებას“ დღეს ერთადერთი გამოსავალი აქვს, რომ მოუსმინოს იმ რჩევებს, რასაც მას აძლევენ ჩვენი დასავლელი პარტნიორები, დაუყოვნებლივ გაათავისუფლოს პოლიტპატიმრები - გიორგი რურუა და ნიკა მელია საპატიმროდან და დაიწყოს მოლაპარაკებები ვადამდელ საპარლამენტო არჩევნებზე.