თბილისში, „ნაციონალური მოძრაობისა“ და სხვა ოპოზიციური პარტიების აქცია-მსვლელობაზე სალომე სამადაშვილმა განაცხადა, რომ „ქართულ ოცნებას“ დღეს ერთადერთი გამოსავალი აქვს, რომ მოუსმინოს იმ რჩევებს, რასაც მას აძლევენ ჩვენი დასავლელი პარტნიორები, დაუყოვნებლივ გაათავისუფლოს პოლიტპატიმრები - გიორგი რურუა და ნიკა მელია საპატიმროდან და დაიწყოს მოლაპარაკებები ვადამდელ საპარლამენტო არჩევნებზე.

„ამის ალტერნატივა „ქართული ოცნებისთვის“ და პირადად ბიძინა ივანიშვილისთვის არის დასავლეთის მხრიდან შემუშავება მთელი რიგი ღონისძიებების, მათ შორის სანქციების, იმიტომ, რომ არავინ არ აპირებს ბიძინა ივანიშვილს დაუთმოს ეს ქვეყანა, რომელშიც გასული 30 წლის განმავლობაში ჩვენმა დასავლელმა პარტნიორებმა უამრავი რესურსი დახარჯეს იმისთვის, რომ ამ ქვეყანაში შექმნილიყო დემოკრატიული საზოგადოება და დემოკრატიული სახელმწიფო. ჩვენ და ჩვენი დასავლელი პარტნიორები არ მივცემთ უფლებას ოლიგარქ ივანიშვილს და მის ხელისუფლებას, რომ წაართვას ქართველ ხალხს ის ისტორიული არჩევანი, რაც დიდი ხნის წინ გააკეთა - ჩვენი მომავალი ნატოში და ჩვენი მომავალი ევროკავშირში და თავისუფალი საზოგადეობა“, განაცხადა სალომე სამადაშვილმა.