საქართველოს პრემიერ-მინისტრის, ირაკლი ღარიბაშვილის ხელმძღვანელობით ეკონომიკური საბჭოს სხდომა მიმდინარეობს. როგორც სხდომაზე ღარიბაშვილმა აღნიშნა, ,,თბილისის აბრეშუმის გზის ფორუმი" მაღალი სტანდარტებით ჩატარდა.


,,თბილისის აბრეშუმის გზის ფორუმის“ ჩატარებისთვის, საქართველოს პრემიერ-მინისტრი ირაკლი ღარიბაშვილი განსაკუთრებულ მადლობას უხდის ყველა იმ უწყებას და ორგანიზაციას, რომლებმაც თავისი წვლილი შეიტანეს ქვეყნისთვის უმნიშვნელოვანესი პროექტის განხორციელებაში.


,,საქართველოს ეკონომიკის სამინისტროს, საგარეო საქმეთა სამინისტროს და მთავრობის ადმინისტრაციის ყველა ის თანამშრომელი, რომლებიც ჩართულნი იყვნენ ფორუმის ორგანიზებაში და მის წარმართვაში, განსაკუთრებულ მადლობას იმსახურებენ. მაღალი სტანდარტებით ჩატარებული ღონისძიება, ნაყოფიერი აღმოჩნდა ჩვენი ქვეყნისთვის და ამაში დიდია ორგანიზატორების წვლილი“- განაცხადა საქართველოს პრემიერ-მინისტრმა ირაკლი ღარიბაშვილმა ეკონომიკური საბჭოს სხდომაზე.

მთავრობის ადმინისტრაციის ინფორმაციით, საქართველოში ნაკლებად განვითარებული დარგების ასაღორძინებლად, ხელისუფლება ინვესტორებისთვის დამატებითი წახალისების მექანიზმების შემუშავებას იწყებს.


მათივე განმარტებით, პროექტი, რომელიც საინვესტიციო გარემოს გაუმჯობესებასა და ინვესტორებისთვის გარანტიების უზრუნველყოფის მექანიზმებს ითვალისწინებს, ეკონომიკურმა საბჭომ შესაბამის სახელმწიფო უწყებებთან ერთად შეიმუშავა. პროექტზე მუშაობა გრძელდება და მასში საერთაშორისო ორგანიზაციები ჩაერთვებიან.


"ეს იქნება ინვესტიციების წახალისების მექანიზმები, მათ შორის ისეთ დარგებში, რომლებიც საქართველოში ნაკლებად არის განვითარებული. ეს შექმნის დამატებით სტიმულს მსხვილი ინვესტორებისთვის, რათა ისინი შემოვიდნენ ამ დარგებში, დააბანდონ კაპიტალი და შექმნან სამუშაო ადგილები. ეკონომიკურმა საბჭომ მოიწონა პროექტი. ჩვენ გავაგრძელებთ მუშაობას დოკუმენტზე, მათ შორის დონორ ორგანიზაციებთან, რათა მოვისმინოთ მათი პოზიციები და შეჯერებულ ვარიანტს გავაცნობთ საზოგადოებას", - განაცხადა ეკონომიკური საბჭოს აპარატის ეკონომიკური განვითარების სამსახურის უფროსმა ნინო ჯავახაძემ.