აშკალის საჯარო სკოლა წალკის რესურსცენტრის წარმომადგენლის მიერ დეტალურად შემოწმდა და ყველა ის პარამეტრი დააკმაყოფილა, რაც პანდემიის პირობებში ზოგადსაგანმანათლებლო დაწესებულებებისთვის ჯანდაცვის სამინისტროს მიერ რეკომენდაციის სახით არის დაწესებული.

აღნიშნულის შესახებ GUARDIAN.GE-ის წალკის მუნიციპალიტეტის სოფელ აშკალის სომხურენოვანი საჯარო სკოლის დირექტორმა, ვაჟა ზურნაჩიანმა (მაღლა ფოტოზე) განუცხადა.

„თავიდან ბოლომდე შემოწმდა ჩვენი სკოლა და დადებითი დასკვნა იქნა შედგენილი. ჩვენ, პანდემიის პირობებში განსაკუთრებით ვიცავთ ჰიგიენის ნორმებს და როგორც ჩანს, ამის შედეგია ის, რომ მეორე სემესტრის დაწყებიდან ჩვენს სკოლაში კორონავირუსი არ გამოვლენილა და სწავლას საკლასო ოთახებში განვაგრძობთ. განათლების სამინისტრო გვაწვდის დეზობარიერებს, ნიღბებს და სხვა საშუალებებს.

„აღსანიშნავია, რომ მიუხედავად მკაცრი ზამთრისა, არ მომხდარა წყლით მომარაგების მხრივ შეფერხება. იცით, რომ სველი წერტილები უკვე სექტემბრიდან სკოლის შენობაში გვაქვს განთავსებული და სრულად არის დაცული სისუფთავე და ჰიგიენის ნორმები“, უთხრა GUARDIAN.GE-ის ვაჟა ზურნაჩიანმა.

ზურნაჩიანის განცხადებით, სკოლა ელექტრონულ ჟურნალებზეა გადასული და პედაგოგები შეფასებებს უკვე იქ აკეთებენ.

„იცით, რომ ყველა სიახლე კარგად რომ დამკვიდრდეს, გარკვეულ დროს მოითხოვს. ჩვენმა მასწავლებლებმა კარგად აითვისეს ელექტრონული ჟურნალები, თუმცა ამ პროექტს გარკვეული ტექნიკური ხარვეზები ახლავს, რომელიც, ვფიქრობთ, რომ მალე გამოსწორდება“, განუცხადა GUARDIAN.GE-ის ვაჟა ზურნაჩიანმა.