ამერიკული გამოცემა The Washington Post -ი "რუსთავი2" -ის გარშემო შექმნილ მდგომარეობაზე წერს. "ტელეკომპანიის გარშემო შექმნილი აურზაურის ფონზე საქართველოს პრეზიდენტი ყველა ძალას სიმშვიდისკენ მოუწოდებს" - ამ სათაურით გამოქვეყნდა გამოცემაში სტატია, რომელშიც ნათქვამია, რომ რუსთავი 2-ის საქმეზე მოდავე, ქიბარ ხალვაში, 10 წლის წინათ მცირე პერიოდით იყო არხის მეპატრონე, ახლა კი მფლობელებისგან 7.8 მილიონი დოლარის კომპენსაციას ითხოვს. ოპოზიცია მიიჩნევს, რომ მომავალი საპარლამენტო არჩევნების წინ, ხელისუფლებას რუსთავი 2-ის საშუალებით კრიტიკული აზრის ჩახშობა სურს.


„ქიბარ ხალვში უარყოფს, რომ ტელეკომპანიის დახურვა სურს, თუმცა ცოტა ხნის წინათ აღნიშნა, რომ რუსთავი 2 ყოფილი პრეზიდენტისა და „ნაციონალური მოძრაობის“ ყოფილი ლიდერის, მიხეილ სააკაშილის გავლენის ქვეშ იმყოფება და პარტიის დაკვეთებს ასრულებს“ - აღნიშნულია სტატიაში.


გამოცემა, პრეზიდენტ გიორგი მარგველაშვილის განცხადებასაც უსვამს ხაზს.


„პრეზიდენტმა მარგველაშვილმა განაცხადა, რომ სამოქალაქო დაძაბულობის საფრთხე დიდია და სასამართლოს მოუწოდა, არ მიიღოს ნაჩქარევი გადაწყვეტილება“ - ნათქვამია სტატიაში.

"მარგველაშვილმა 2013 წლის საპრეზიდენტო არჩევნებში გაიმარჯვა როგორც მილიარდერ ბიძინა ივანიშვილის მოკავშირემ, მაგრამ მას შემდეგ ცდილობს დამოუკიდებელი როლი ითამაშოს.

ივანიშვილმა 2012 წლის საპარლამენტო არჩევნებში დიდი უპირატესობით გაიმარჯვა, მაგრამ საზოგადოებრივი კვლევები აჩვენებს, რომ 2016 წლის საპარლამენტო არჩევნების წინ მისი პარტია "ნაციონალური მოძრაობის" რეიტინგს ჩამორჩება", აღნიშნულია სტატიაში.