ბოლო პერიოდში, აფხაზეთის რეგიონში განვითარებულმა მოვლენებმა, კიდევ ერთხელ დაგვანახა და დაგვარწმუნა იმაში, რომ აფხაზურ და ქართულ საზოგადოებაებში არიან მოღალატე ადამიანები, რომლებიც შეგნებულად ხელს უშლიან ჩვენი საზოგადოებების ერთმანეთთან დაახლოებას, ნდობის აღდგენას და დიალოგისთვის ხელსაყრელი პირობების შექმნას.

გასული საუკუნის 90-იანი წლებიდან მოყოლებული დღემდე არსებობენ ასეთი ადამიანები და შეცვლილი გარემოებების მიხედვით მიზანმიმართულად მოქმედებდნენ, ასევე, დღემდე გვესმის ქართულ-აფხაზური ურთიერთობების ნორმალიზების საჭიროება ხელისუფლებების მხრიდან, მაგრამ რატომღაც ყველა ჯერზე კონფლქიტის ტრანსფორმაციის შანსებს და შესაძლებლობებს ვუშვებთ ხელიდან.

იქიდან გამომდინარე, რომ ცენტრალურ ხელისუფლებაზე მეტი წილი პასუხიმგებლობა მოდის, სწორედ ამ საკითხებზე პასუხისმგებელმა უწყებებმა უნდა შეძლონ ყველა შესაძლო ნეგატიურ ფაქტორზე პრევენციულად და პროაქტიურად მოქმედება, მაგრამ თუ სწორი სტრატეგიული ხედვა არ ჩამოყალიბდება კონფლიქტების მოგვარების მიმართულებით, და დავრჩებით ტრაფარეტული, გაზეპირებული ერთი და იგივე აზრის მატარებელი განცხადებების ამარა, კიდევ უფრო დავშორდებით აფხაზური და ქართული საზოგადოებები ერთმანეთს, არც სავაჭრო ურთერთბები გამოგვივა, არც ჰუმანიტარული ფორმატები იქნება წარმატებული.

ამის ფონზე კი რჩება განცდა, დიდი ხნით, ვერც არსებულ სტატუს-კვოს შევინარჩუნებთ. შესაბამისად, დადგა დრო დევნილებმა, კონფლიქტის შედეგად დაზარალებულმა ადამიანებმა ამოვიღოთ ხმა და ვიმოქმედოთ! არ ვიქცეთ თვალთმაქცური პოლიტიკის იარაღად და არც იმ ადამიანებს დავაფაროთ ხელი, რომლებსაც ხელისუფლებების ცვლილებების მიუხედავად ისევ თანამდებობებზე ვხედავთ და უკვე ყველანაირი რესურსი ამოწურეს უკეთესობისკენ შეცვალონ დევნილებისა თუ კონფლიქტით დაზარალებული ადამიანების ბედი.

აღმასრულებელი ხელისუფლების დონეზე, გადანაწილებული პასუხიმგებლობების ნაცვლად, ჩვენ მივიღეთ უპასუხიმგებლო, არაქმედითი ნაბიჯები კონფლიქტების ნორმალიზების გზაზე - პრაგმატული პოლიტიკისგან დაცლილი შერიგების მყიფე პროცესი, ხოლო დღევანდელი აფხაზეთის ხელისუფლების სახით უმოქმედო და უუნარო აღმასრულებელი თუ საკანონმდებლო ორგანო.

მუდმივად მოლოდინის რეჟიმში ვეღარ ვიქნებით და ვიწყებთ აქტიურ მოქმედებებს ღრმა ჭაობისკენ მიმავალი პროცესების შესაჩერებლად და შესაცვლელად, ამიტომ მოვუწოდებთ დევნილ საზოგაოდებას ამ საკითხების ირგვლივ გაერთიანებისკენ და კონსოლიდაციისკენ. ჩვენ ვართ ის ძალა, რომელსაც რეალურად უნდა იყენებდეს ხელისუფლება კონფლიქტების მოგვარების პროცესში და არა პირიქით, გვრიყავდეს ამ პროცესებიგან. ერთ წრეზე ტრიალი, უპასუხისმგებლობა, არაკეთილსინდისიერება, არაპროფეიონალიზმი უნდა დასრულდეს!

ნუკრი ნოდია,

არასამთავრობო ორგანიზაცია „კავკასიელ ხალხთა თანამეგობრობის“ თავმჯდომარე