წალკის მუნიციპალიტეტის სოფელ აშკალის საჯარო სკოლის დირექტორის, ვაჟა ზურნაჩიანის განცხადებით, სკოლას რამდენიმე დღის წინ ინკლუზიური განათლების პროცესში ჩართვის მსურველი პირველკლასელი მოსწავლის მშობელმა მიმართა.

როგორც ვაჟა ზურნაჩიანმა GUARDIAN.GE-ის განუცხადა, სკოლის დირექციამ მალევე შეადგინა ყველა საჭირო დოკუმენტაცია და განათლების სამინისტროს გადაუგზავნა, რათა დროულად მოხდეს ბავშვის ინკლუზიური განათლების პროგრამაში სრულფასოვანი ჩართვა.

„იმ წუთიდანვე, როგორც კი ბავშვის მშობელმა მოგვმართა, დავუკავშირდით წალკის მუნიციპალიტეტის რესურსცენტრს, ვაცნობეთ საკითხის შესახებ, შევადგინეთ აუცილებელი დოკუმენტაცია და გავუგზავნეთ განათლებისა და მეცნიერების სამინისტროს. მანამდე ჩვენთან მსგავს მომართვას ადგილი არ ჰქონია. ბავშვს მეტყველებასთან დაკავშირებული პრობლემები აქვს. ის დაჰყავდათ ლოგოპედთან თბილისში, მაგრამ როგორც მშობელმა გვითხრა, სასურველი შედეგი არ არის. ჩვენი ვალია, ყველანაირად ხელი შევუწყოთ ამ მოზარდის დროულად და სრულფასოვნად ჩაბმას სასწავლო პროცესში. ველოდებით სამინისტროს შესაბამის რეაგირებას“, განუცხადა ვაჟა ზურნაჩიანმა GUARDIAN.GE-ის.

მისი თქმით, სკოლაში, მარტის არადადეგების შემდეგაც სასწავლო პროცესი საკლასო ოთახებში გამართულად მიმდინარეობს, კლასებში მოსწავლეთა 100%-იანი დასწრებაა, 2 კვირაში ერთხელ პედაგოგების და ადმინისტრაციული პერსონალის ტესტირება ტარდება კორონავირუსზე და ჯერჯერობით ვირუსის არც ერთი შემთხვევა არ გამოვლენილა.

შენიშვნა: განათლების სამინისტროს ვებგვერდზე გამოქვეყნებული ინფორმაციის თანახმად, ინკლუზიური განათლება – გულისხმობს ყველა ტიპის სპეციალური საგანმანათლებლო საჭიროებების მქონე მოსწავლეების ჩართვას ზოგადსაგანმანათლებლო სასწავლო პროცესში თანატოლებთან ერთად. ინკლუზიური განათლება ასევე გულისხმობს შეზღუდული შესაძლებლობების მქონე მოსწავლეების ინდივიდუალური და/ან მოდიფიცირებული სასწავლო გეგმებით სწავლებას.