მათ ჩაშალეს საბოლოო ჯამში შეთანხმება. თქვენ ნახეთ მათი გაღიზიანებული სახეები და გაღიზიანებული რიტორიკა, ყველამ დაინახა იქ, რომ ჩამშლელი იყო სწორედ ოპოზიცია - განაცხადა პარტია „ქართული ოცნების“ თავმჯდომარემ ირაკლი კობახიძემ და დასძინა, რომ ოპოზიცია კიევიდან მიხეილ სააკაშვილის მიერ იმართება.

„სამწუხაროდ, გამართლდა ის, რაზეც ჩვენ ვსაუბრობდით. როგორც ჩანს ოპოზიციისთვის იყო თვითმიზანი შეთანხმების არმიღწევა. ეს გამოიხატა იმაში, რომ დაყენებული იყო ულტიმატუმები, მათ შორის ისეთიც, რომელიც ითვალისწინებდა კანონის უზენაესობის ფეხქვეშ გათელვას. ბუნებრივია, ასეთი ულტიმატუმები არის აბსოლუტურად მიუღებელი დიალოგის პროცესში. თვითმიზანი იყო ამ ოპოზიციისთვის ამ მოლაპარკებების ჩაშლა. ეს სპექტრი, არის ერთი-ორი გამონაკლისი, მაგრამ ეს ოპოზიციური სპექტრი, მათი უმეტესობა, რომელიც აქ იყო წარმოდგენილი დიალოგის რეჟიმში, იმართება კიევიდან მიხეილ სააკაშვილის მხრიდან. შესაბამისად, ასეთ ვითარებაში, მათ შეთანხმებაზე წამოსვლის არავითარი რესურსი არ ჰქონდათ...სააკაშვილის, ბოკერიას და ამ ხალხის მიზანი პირველ რიგში არის ის, რომ წააგოს სახელმწიფომ. ჩვენ ბუნებრივია, ამას ვერ დავუშვებდით და ეს ყველამ დაინახა“, განაცხადა კობახიძემ.

მან იმედი გამოთქვა, რომ მიუხედავად ამისა, ოპოზიციასთან დიალოგის პროცესი შესაძლოა გაგრძელდეს.