ინფექციური საავადმყოფოს დირექტორის, თენგიზ ცერცვაძის განცხადებით, მიუხედავად იმისა, რომ საქართველოში ინფიცირების ახალი შემთხვევების რაოდენობა დასტაბილურდა, ქვეყანა მაინც სერიოზული საფრთხის წინაშე დგას, რადგან უპრეცედენტო პასიურობა და უდიდესი სკეპტიციზმია ვაქცინის მიმართ და ამასთან, ხალხი გათამამდა, აღარ ასრულებს მინიმალურ რეგულაციებს.

„საქართველომ აქამდე მოახერხა შედარებით უკეთესი მაჩვენებლებით მოსვლა, ეს ეხება შემთხვევების სტაბილურ რაოდენობას, რომელიც გამონაკლისის გარდა 400-ზე მეტი არ არის. ასევე გვაქვს გარდაცვალების ძალიან დაბალი რიცხვი, რომელიც დიდი ხანია 10-ს არ გადასცილებია. მაგრამ ასე დიდხანს ვერ გაგრძელდება, არ ვცხოვრობთ იზოლირებულ სამყაროში და სერიოზული საფრთხის წინაშე ვდგავართ რამდენიმე მიზეზის გამო.

ორი ძირითადი ფაქტორია - პირველი ის, რომ საქართველოში, მიუხედავად იმისა, რომ ვაქცინა შემოვიდა და კიდევ უწყვეტად შემოვა, უპრეცედენტო პასიურობაა ვაქცინის მიმართ და უდიდესი სკეპტიციზმი. ფაქტობრივად, მასობრივი ვაქცინაცია ვერ ხერხდება. მეორე ფაქტორი ისაა, რომ ხალხი გათამამდა, აღარ ასრულებს მინიმალურ რეგულაციებს, განსაკუთრებით პირბადის ტარებაზე. 70% იყო პირბადის ტარების მაჩვენებელი, ახლა ჩამოვიდა 42%-ზე, რაც საგანგაშო ნიშანია“, განაცხადა თენგიზ ცერცვაძემ.

იგი არ გამორიცხავს, ვაქცინაციაში ჩასართავ პირთა ასაკობრივმა ზღვარმა კიდევ უფრო დაიწიოს ან საერთოდ მოიხსნას.

„ორი საბჭოა, ერთი ვაქცინაციის უწყებათაშორისი და მეორე იმუნიზაციის გვერდითი მოვლენების, მე არც ერთი საბჭოს წევრი არ ვარ, მაგრამ რამდენადაც მაქვს ინფორმაცია, ეს გამორიცხული არ არის, შესაძლოა, ასაკობრივმა ზღვარმა კიდევ დაიწიოს და საერთოდ, თუ ასეთი პასიურობა იქნა, შეიძლება, იყოს გახსნილი, საყოველთაო“, განაცხადა ცერცვაძემ.

პირველ ეტაპზე, კორონავირუსის საწინააღმდეგო ვაქცინა გათვლილი იყო სამედიცინო პერსონალისთვის, როგორც ყველა დიდი რისკის ჯგუფისთვის, თუმცა ვაქცინაციის პროცესში პასიურობის გამო, აცრის საშუალება მიეცათ 65 წელს ზემოთ პირებსაც. ამასთან, მოქალაქეს ექნებათ შესაძლებლობა, გააკეთონ არჩევანი „ფაიზერისა“ და „ასტრაზენეკას“ ვაქცინებს შორის.