ოპოზიციას დარჩა დღეს სულ რაღაც ორი არჩევანი. ერთი, რომ მოისმინონ და გაითვალისწინონ ჩვენი უცხოელი და სტრატეგიული პარტნიორების მოწოდებები და შევიდნენ პარლამენტში და მეორე, თუ ისინი არ გაემიჯნებიან სააკაშვილის რადიკალურ პოლიტიკას, მათ მოუწევთ მარგინალიზაციის გზით სიარული, - განაცხადა საქართველოს პრემიერ მინისტრმა ირაკლი ღარიბაშვილმა მედიასთან საუბრისას აჭარის რეგიონში სტუმრობისას.

„მინდა გამოვეხმაურო იმ ორგანიზებულ თავდასხმას, შეტევას, რომელიც ოპოზიციის წარმომადგენლებმა მიიტანეს ვიცე-პრეზიდენტ ბორელის მიმართ. ეს კიდევ ერთხელ უჩვენებს თუ რა ძალასთან გვაქვს საქმე, მე ვგულისხმობ რადიკალურ ოპოზიციას და მათ დესტრუქციულ ქმედებებს. აქედან გამომდინარე, მე მინდა ვთქვა შემდეგი, რომ ოპოზიციას დარჩა დღეს სულ რაღაც ორი არჩევანი. ერთი, რომ მოისმინონ და გაითვალისწინონ ჩვენი უცხოელი და სტრატეგიული პარტნიორების მოწოდებები და შევიდნენ პარლამენტში, დაასრულონ ეს ხელოვნურად შექმნილი კრიზისი, ეს მასკარადი, აბსოლუტურად არაპროდუქტიული ქმდებები და მეორე, თუ ისინი გააგრძელებენ კვლავაც დესტრუქციული ქმედების განზორციელებას, არ გაემიჯნებიან სააკაშვილის რადიკალურ პოლიტიკას, რა თქმა უნდა, მათ მოუწევთ მარგინალიზაციის გზით სიარული. რაც შეეხება ოპოზიციის მიერ დაანონსებულ აქციის გამართვას ორი თვის შემდეგ, დამისახელეთ ნებისმიერი ქვეყანა, სადაც ოპოზიცია აანონსებს აქციას 2 თვის შემდეგ. ეს რაზე მიუთითებს, რომ საკუთარი მხარდამჭერებიც კი აღარ დადიან მათ მიერ დაანონსებულ აქციებზე. ეს კიდევ ერთხელ მიანიშნებს იმაზე, რომ ოპოზიცია არის სრულ გაუგებრობაში. ძალიან მძიმე, კატასტროფულ მდგომარეობაში არიან. მე ვგულისხმობ რადიკალურ, სააკაშვილის ფრთას და ზოგადად მათ ქმედებებს“, განაცხადა ირაკლი ღარიბაშვილმა.