„მსოფლიო საოჯახო კონგრესის“ დამფუძნებელი, ბიზნესმენი ლევან ვასაძე აცხადებს, რომ ბიძინა ივანიშვილი პოლიტიკიდან არსად არ წასულა, „განფენილია“ და მართავს, როგორც მოქმედ პრემიერ მინისტრს, ირაკლი ღარიბაშვილს, ისე ყოფილს, გიორგი გახარიას.

ტელეკომპანია „ქართულ არხზე“ „უცნობის კიდობანში“ სტუმრობისას მან თქვა, რომ ივანიშვილმა და მისმა „რეფორმატორებმა“ „ქვეყანა დატოვეს ხელმძღვანელის გარეშე, მოაწყვეს სრული დომხალი“.

„მე არ მჯერა, რომ ბიძინა სადმე წავიდა. არ შემიძლია კაცს ბრალი დავდო ტყუილში, კი თქვა, წავედიო, მაგრამ ვისაც სჯერა, რომ ირაკლი მისი ქვეშევრდომი არ არის, ღმერთმა ხელი მოუმართოს; ვისაც სჯერა, რომ გახარია მისი ქვეშევრდომი არ არის... ანუ გვყავდა ბიძინა კონცენტრირებული, ახლა გვყავს ბიძინა განფენილი; გვყავს ბიძინა, ვენაცვალე კახელებს კახური, ირაკლის მეშვეობით, ქართლ-კახური, ღარიბაშვილის; გვყავს ბიძინა მეგრული, ვენაცვალე ჩვენს მეგრელებს, გახარიას მეშვეობით; გვყავს ბიძინა ნარკო-პლანაქეშურ-კულტივატორული, „გირჩის“ სახით. აბა მე ხომ არ შევქმენი, კაცო, ეს პარტია და აღარ ჩამოვთვლი რაა. და მისი სტრატეგია, ახლა, მე არ ვიცი ეს თვითშენარჩუნების თუ თავის თავისდაცვის, ეს არის.

„მე არ მინდა მას ბრალი დავდო ტყუილში, თქვა, რომ წავედიო... თუ მართლა გინდოდა წასვლა, ქვეყანა არ უნდა შეგეყვანა პოლიტიკურ ჩიხში, რომელშიც ამ რეფორმებმა შეიყვანა, მედლებს რომ ჰკიდებენ ერთმანეთს ეს ტიპები, ვინც ეს რეფორმა ჩაატარა. ქვეყანა დატოვეს ხელმძღვანელის გარეშე, მოაწყვეს სრული დომხალი. „ნაცებიც“ მაგათმა დააბრუნეს და შეინარჩუნეს კოჰაბიტაციით პოლიტიკაში და შექმნეს რელობად და ახლა ჩვენ გვაქვს დაახლოებით ასეთი სიტუაცია, რომ ნახევარზე მეტი ხალხი არ დადის არჩევნებზე, ამბობს, რომ თქვენი ყველასი ჭკუაც ვატირე. ის ხალხი, რომელიც ჯერ კიდევ მიდის და „ქოცებს“ აძლევს ხმას, მარტო იმიტომ აკეთებს ამას, რომ ვაიდა „ნაცები“ არ დაბრუნდნენ და „ნაცებს“ სხვათა შორის ვინც აძლევს ხმას, არის რაღაც ნაწილი, ეს სექტა, და არის რაღაც ნაწილი, რომელიც ამბობს, რომ ბიძინას ჯინაზე, მე მაგას ვერასდროს ვერ გავიგებ, და ქვეყანა არის მისული აბსოლუტურ ჩიხში და ხალხის პრობლემები არავის არ აინტერესებს. სიღარიბე, ვალებში ჩახრჩობა, სრული ნარკომანიზაცია ახალგაზრდა თაობის, განათლების სისტემის დანგრევა, სრული უპერსპექტივობა ეკონიმიკაში, ყევლაფერში და გეოპოლიტიკური ენდშპილი (თამაშის დასასრული), არსად არ მივდივართ, არსად არ ვვითარდებით“, განაცხადა ლევან ვასაძემ.