4-წლიანი პატიმრობის შემდეგ „ცენტრ პოინტის“ ერთ-ერთმა დამფუძნებელმა, რუსუდან კერვალიშვილმა საპატიმრო დატოვა. #5 პენიტენციურ დაწესებულებასთან მას ოჯახის წევრები და ახლობლები დახვდნენ.

„ჩემი გული დავტოვე სასჯელაღსრულების დაწესებულებაში. იცით, რომ ჩემი და, მაია რჩეულიშვილი ისევ პატიმრობაშია. თავისუფლების ფასი არაფერი არ არის. აქ თავისუფლებას ვგრძნობდი ჩიტების ფრენით. ბევრი ჩიტია. განცდა ძალიან დიდი მაქვს. ერთი ძალიან დიდი სინანული მაქვს – ის ადამიანები, რომლებიც ძალიან გვენდნენ, წლების განმავლობაში დაზარალდნენ ჩვენთან ერთად. სამწუხაროდ, ჯერ კიდევ არ მოხერხდა, მიუხედავად იმისა, რომ ხუთი წელიწადია მაია აქ არის და მე ოთხი წელიწადია, რომ პრობლემა დასრულდეს, მაგრამ ახლა იმედი მოგვეცა, რომ იწყება მშენებლობა ერთ თვეში მერიასთან ერთად და ჩვენი ამოცანა, სანამ ვართ მე და მაია, ჩვენი ამოცანა ერთია, ყველა ადამიანი ბედნიერი იყოს და შევიდეს თავიანთ ბინებში და მიიღოს თავიანთი ქონება. ამის მერე ვიქნებით მართლა თავისუფლები“, განაცხადა რუსუდან კერვალიშვილმა.

მას ამხანაგობა „თაბუკაშვილი 88-ის“ ეპიზოდზე 4 წლით თავისუფლების აღკვეთა 2017 წელს მიესაჯა.

რაც შეეხება მაია რჩეულიშვილს, შეფარდებული 7-წლიანი სასჯელიდან მას უკვე 4 წელზე მეტი მოხდილი აქვს. კომპანია „ცენტრ პოინტის” დამფუძნებელსა და ხელმძღვანელს ამნისტიის აქტი შეეხო, მაგრამ საპატიმროს დატოვებაზე დაზარალებულთა თანხმობა სჭირდება.

მაია რჩეულიშვილს თანხების მითვისებასა და გაფლანგვაში ედება ბრალი. საქმე რამდენიმე ეპიზოდს მოიცავს.