გურიის ყოფილი გუბერნატორი გია სალუქვაძე ყოფილი პროკურორისა და გიორგი გახარიას პრემიერ მინისტრობისას მთავრობის ადმინისტრაციის უფროსის, ნათია მეზვრიშვილის ნიკა მელიას დაკავებასთან დაკავშირებით გაკეთებულ განცხადებას სოციალურ ქსელში ეხმაურება და აცხადებს, რომ „სააკაშვილის რეჟიმის დროს, ნათია მეზვრიშვილი დამსჯელი პროკურორის როლში, მრავალ პროცესზე გვინახავს“.

„მსურს გამოვეხმაურო „ტვ პირველზე“ ნათია მეზვრიშვილის ინტერვიუს, რომელიც ნიკა მელიას დაკავებას ეხებოდა. მეზვრიშვილის ვერსიით, შესაძლებელი იყო მელიას პატიმრობის გარეშე დატოვება. იგი არ ეხება დაკავების საფუძველს და შევეცდები მეც არ შევეხო მას. მელიამ სამაჯურის მოხსნით სილა გააწნა სახელმწიფოს, ხოლო გირაოს გადაუხდელობით ქვეყნის ყველა ინსტიტუციაზე ზემოთ დააყენა საკუთარი თავი. მისი გათვლა პრაგმატული იყო, დაიჭერდნენ და პოლიტპატიმრად გამოაცხდებდა ოპოზიცია, თუ არ დაიჭერდნენ, მაშინ ქვეყნის მართლმსაჯულება მიწასთან იქნებოდა გასწორებული, სახელმწიფო მოიქცა მართლზომიერად, სასამართლოს გადაწყვეტილების შესაბამისად დააკავა მელია. აშკარაა, რომ მეზვრიშვილმა თანამდებობიდან წასვლის შემდეგ ფერი იცვალა.

P.S. სააკაშვილის რეჟიმის დროს, ნათია მეზვრიშვილი დამსჯელი პროკურორის როლში, მრავალ პროცესზე გვინახავს. მაგალითად, პატიმრობაში მყოფ გია შერაძის, გურამ ჩიჩუასა და აწ გარდაცვლილი შოთა მაისურაძის პროცესი, სადაც ბრალმდებელ მეზვრიშვილის მეცადინეობით სამივეს მიმართ გამამტყუნებელი განაჩენი დადგა, შარშან კი სასამართლომ სამივე პირი გაამართლა. ახალი გამოძიებისას გამოვლინდა უმძიმესი დარღვევები საქმის ყოფილი გამომძიებლისა და პროკურორ მეზვრიშვილის, როგორც სავარაუდო დამნაშავეების მიმართ. სამწუხაროდ, ამ უკანონობას შეეწირა ბატონი შოთა მაისურაძე“, წერს გია სალუქვაძე.