დაავადებათა კონტროლის ეროვნული ცენტრის ინფორმაციით, საქართველოში კორონავირუსის საწინააღმდეგო ვაქცინით აცრილი ადამიანებიდან 27 შემთხვევაში დაფიქსირდა სერიოზული გვერდითი გართულება.

„სერიოზული გართულება, რომელიც შეტყობინებას ექვემდებარებოდა, იყო 27, დანარჩენი მსუბუქი გართულებები და გვერდითი მოქმედებები იყო“, – განაცხადა ბრიფინგზე დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ.

ამავე ცენტრის გადამდებ დაავადებათა დეპარტამენტის ხელმძღვანელის, ხათუნა ზახაშვილის თქმით, 27 შემთხვევიდან ოთხ შემთხვევაში საჭირო გახდა ინტენსიური თერაპია, სამ შემთხვევაში ჰოსპიტალიზაცია, ორ შემთხვევაში კი რეანიმაციული ღონისძიებები.

„გვერდითი მოვლენები და რეაქციები შეიძლება ჰქონდეს ვაქცინაციის შემდეგ ადამიანს, მათ შორის განსაკუთრებულ ყურადღებას საჭიროებს რამდენიმე გვერდითი მოვლენა და რეაქცია, საქართველოში ვაქცინირებულებიდან ასეთი ადმიანები ჯერჯერობით რეგისტრირებული გვაქვს 27 შემთხვევაში, მათგან ოთხი შემთხვევა იყო, როდესაც დასჭირდათ ინტენსიური თერაპია, სამ შემთხვევაში დასჭირდათ ჰოსპიტალიზაცია, ორ შემთხვევაში რეანიმაციული ღონისძიებები“, განაცხადა ხათუნა ზახაშვილმა.