საქართველოს თავდაცვის მინისტრი პირველ სამუშაო ვიზიტად ლატვიის რესპუბლიკას ესტუმრა. ჯუანშერ ბურჭულაძემ ვიზიტი ლატვიელ კოლეგასთან, არტის პაბრიკსთან შეხვედრით დაიწყო. შეხვედრებზე მხარეებმა ორ ქვეყანას შორის თავდაცვის სფეროში თანამშრომლობის მიმდინარე საკითხები და სამომავლო გეგმები განიხილეს.
თავდაცვის მინისტრმა ხაზგასმით აღნიშნა საქართველოსა და ლატვიას შორის არსებული განსაკუთრებული მეგობრობა და ძლიერი პარტნიორობა. მან ლატვიის მხარეს საქართველოს ტერიტორიული მთლიანობისა და სუვერენიტეტის, ასევე ევრო-ატლანტიკური მისწრაფებების მხარდაჭერისთვის მადლობა გადაუხადა.
თავდაცვის მინისტრებმა შეხვედრაზე საქართველოს ოკუპირებულ რეგიონში არსებულ ვითარებაზე, რუსეთიდან მომავალ საფრთხეებზე და გლობალური უსაფრთხოების გამოწვევებზე ისაუბრეს.
ჯუანშერ ბურჭულაძემ კოლეგას საქართველოს თავდაცვის ტრანსფორმაციის პროცესი და ნატოსთან თავსებადობის მიღწევის მიზნით განხორციელებული რეფორმები გააცნო. ყურადღება გამახვილდა ნატო-საქართველოს არსებითი პაკეტით გათვალისწინებული ინიციატივების წარმატებით განხორციელებაზე, საერთაშორისი მისიებში საქართველოს წვლილზე, ორმხრივი თანამშრომლობის გეგმით გათვალისწინებულ ღონისძიებებსა და სამხედრო განათლების კუთხით თანამშრომლობის საკითხებზე.
მხარეებმა ევროკავშირთან თანამშრომლობის საკითხებიც განიხილეს. ჯუანშერ ბურჭულაძემ ევროკავშირის სადამკვირვებლო მისიაში (EUMM) ლატვიის მნიშვნელოვანი კონტრიბუცია ხაზგასმით აღნიშნა. მხარეებმა იმედი გამოთქვეს, რომ მჭიდრო და წარმატებული ორმხრივი თანამშრომლობა კიდევ უფრო გაძლიერდება.
ქართული დელეგაციის შემადგენლობაში არიან საქართველოს თავდაცვის მინისტრის პირველი მოადგილე ლელა ჩიქოვანი და თავდაცვის ძალების მეთაურის მოადგილე ბრიგადის გენერალი ირაკლი ჭიჭინაძე. ვიზიტის ფარგლებში თავდაცვის მინისტრი შეხვედრებს გამართავს ლატვიის პრეზიდენტთან ეგილს ლევიტსთან, პარლამენტის სპიკერთან ინარა მურნიეცესთან, საგარეო საქმეთა მინისტრთან, ედგარს რინკევიჩსთან, ასევე, დაგეგმილია სტუმრობა ნატოს სტრატეგიული კომუნიკაციების სრულყოფის ცენტრში და ლატვიის შეიარაღებული ძალების ერთ-ერთ სამხედრო ბაზაზე.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.