პოლიტიკური პარტია „ტრიბუნას“ თავმჯდომარე დავით ჭიჭინაძე აცხადებს, რომ არ ენდობა საქსტატის მიერ გამოქვეყნებულ სტატისტიკას ინფლაციასთან დაკავშირებით და ქვეყანაში ეკონომიკური ვარდნა გაცილებით აღემატება 6 პროცენტს.

როგორც ჭიჭინაძემ „მთავარი არხის“ ერთ-ერთ გადაცემაში სტუმრობისას განაცხადა, ამ ფონზე საქართველოს პრემიერ მინისტრი 10-წლიან ეკონომიკურ გეგმაზე საუბრობს, ეკონომიკის სამინისტროში კი, 250-მდე ადამიანი მუშაობს და 100 მილიონამდე ხელფასი აქვთ აღებული 6 წლის განმავლობაში, ეკონომიკური პროგრამა კი არავის დაუწერია და „ეს 100 მილიონი მოპარულია და წაღებულია, არაფერში, უსაქმურობაში“.

„ინფლაციასაც რომ შეხედოთ, რასაც საქსტატი გვიქვეყნებს, გჯერათ, რომ ის რეალობაშია? თუ საქსტატი რეალურად დათვლის ინფლაციას, ჩვენ მაშინ კატასტროფული ციფრი გვაქვს ეკონომიკური ვარდნის და ის 6 პროცენტზე გაცილებით უფრო მეტია. 6 პროცენტი, ეს არის სანატრელი დღევანდელ პირობებში. ჩვენ შარშან ვარდნა გვქონდა მინიმუმ 10-12%, კატასტროფული სურათი გვაქვს.

„ღარიბაშვილი როდესაც იძახის 10-წლიან ეკონომიკურ გეგმაზე, მე მაინტერესებს, ვინ უნდა დაუწეროს ეს გეგმა?! თუ ნათია თურნავამ იცის და იმ ადამიანებმა, რომლებიც დღეს ეკონომიკას მართავენ, აქამდე რატომ გვიმალავდნენ და რატომ 2 წელიწადია და 3 წელიწადია და ეკონომიკური გუნდი პრაქტიკულად, მინისტრების გარდა არავინ არ შეცვლილა და მოგეხსენებათ, თვითონ ეკონომიკის სამინისტროში 250-მდე ადამიანი მუშაობს და 100 მილიონამდე ხელფასი აქვთ აღებული 6 წლის განმავლობაში, რომელთაც ეკონომიკური პროგრამა უნდა დაეწერათ. ვინმეს გინახავთ? ანუ გამოვიდა, რომ ეს 100 მილიონი მოპარულია და წაღებულია, არაფერში, უსაქმურობაში“, განაცხადა დავით ჭიჭინაძემ.