„მოძრაობა აფხაზეთისთვის“ 7 აპრილს, ოკუპირებული გალის რაიონიდან ენგურის გადმოკვეთისას საქართველოს მოქალაქეების დაღუპვის ფაქტს საგანგებო განცხადებით ეხმაურება და აღნიშნულთან დაკავშირებით პასუხიმგებლობას საქართველოს ხელისუფლებას და აფხაზეთის ავტონომიური რესპუბლიკის მთავრობას აკისრებს.

„7 აპრილს მომხდარი ტრაგედია, გამოიწვია ხელისუფლების (როგორც ცენტრალური, ასევე აფხაზეთის ავტონომიური რესპუბლიკის) გაუაზრებელმა პოლიტიკამ ოკუპირებული ტერიტორიების მიმართ.

11 აპრილს ჩვენმა მოძრაობამ ჩაატარა საპროტესტო აქცია აფხაზეთის უმაღლეს საბჭოსთან, რომლის მიზანიც იყო 5-დღიანი კარანტინის მოხსნა და გალის მოსახლეობისთვის ქმედითი მხარდაჭერის აღმოჩენა. ასევე აქცენტი გაკეთდა იმ ძირითად პრობლემებზე, რომელიც აწუხებს დევნილ მოსახლეობას.

ჩვენი აზრით, უნდა მოხდეს სისტემური ცვლილებები, რაც თავისთავად გამოიწვევს იმ მიმდინარე პრობლემების დარეგულირებას, რომელსაც აწყდება ჩვენი დევნილი საზოგადოება ენგურს გაღმა და ენგურს გამოღმა.

ჩვენს მოძრაობას აქვს კონკრეტული გეგმა თუ როგორ უნდა მოხდეს ამ პრობლემების მოგვარება და დევნილების უფლებების მაქსიმალური დაცვა. გამომდინარე იქიდან, რომ პასუხისმგებლობა ეკისრება არა მხოლოდ აფხაზეთის ხელისუფლებას, არამედ უდიდესი წილი პასუხისმგებლობისა ეკისრება ცენტრალურ მთავრობას, ვაანონსებთ მომავალ აქციას მთავრობის სასახლესთან ხუთშაბათს, 15 აპრილს, 13:00სთ-ზე.

15 აპრილის აქცია ისევ იქნება ორიენტირებული მდგომარეობაზე გალის რაიონში და ასევე დავაყენებთ ყველა იმ საკითხს, რომელიც ეხება აბსოლუტურად ყველა დევნილს, ესენია:

1. აფხაზეთის დაბრუნების რეალისტური სტრატეგიული გეგმის შემუშავება;

2. აფხაზეთის უმაღლესი საბჭოს არჩევნები.

3. ბინათ უზრუნველყოფის საკითხის დროული გადაწყვეტა;

4. 45-ლარიანი შემწეობის გათანაბრება საარსებო მინიმუმთან;

5. ვეტერანის პენსიის გათანაბრება საარსებო მინიმუმთან;

6. ოკუპირებულ ტერიტორიაზე დევნილების უძრავი ქონების რეგისტრაცია;

ჩვენი მოძრაობა არ შედის ალიანსში არც ერთ პარტიულ ორგანიზაციასთან, რათა არ მოხდეს ჩვენი გაიგივება რომელიმე მათგანთან. აფხაზეთი ჩვენთვის არის ზეპარტიული თემა და ის არ შეიძლება იყოს გამოყენებული პარტიული ინსინუაციებისთვის.

მიუხედავად შექმნილი ვითარებისა, ჩვენ მზად ვართ კონსტრუქციული დიალოგისთვის საქართველოს მთავრობასთან, რათა დაჩქარდეს აღნიშნული პრობლემების ეფექტური მოგვარება“, ნათქვამია განცხადებაში.