„ევროპული საქართველოს“ თავმჯდომარე გიგა ბოკერია ყოფილი პრემიერ მინისტრის, გიორგი გახარიას პოლიტიკურ გააქტიურებას და „ქართული ოცნების“ რიგებიდან 6 დეპუტატის წასვლის ფაქტს ეხმაურება და აცხადებს, რომ ივანიშვილის გარემოცვასა და „ქართული ოცნების“ საპარლამენტო შემადგენლობაში რყევები „აბსოლუტურად ბუნებრივია იმ უმძიმესი მდგომარეობის ფონზე, რომელიც ამ გუნდმა შექმნა თავისი მავნებლური, უპასუხისმგებლო ნაბიჯებით ყველა მიმართულებით“.

„რაც შეეხება კონკრეტულად ამ ადამიანების გასვლას და გახარიას ფაქტორს ეგრეთ წოდებულს, ჯერ მკაფიოდ დააფიქსირონ პოზიცია, პასუხები გასცეს ე.წ. მათმა ლიდერმა, გახარიამ უამრავ კითხვას, დააფიქსიროს პოზიცია, როგორც ვადამდელ არჩევნებთან დაკავშირებით, ისე პოლიტიკური პატიმრების გათავისუფლების საკითხთან დაკავშირებით და მერე ვნახოთ რაოდენობა ამ ადამიანები.

ჯერჯერობით გახარიასგან და მისი გარემოცვისგან რაიმე მკაფიო პოლიტიკური პოზიცია არაფერზე არ მოგვისმენია, ამიტომ, მე არ ვარ შეთქმულების თეორიების მომხრე, მაგრამ იმ ვერსიას, რომ ეს ყველაფერი არის რაღაც მცდელობა „ბე“ გუნდის გაკეთების ივანიშვილის გარშემო, საფუძველი აქვს. თუ ეს ასე არ არის, გვაჩვენონ თავიანთი მოქმედებებით. თუ აქ ლაპარაკია, რომ ასეთი მცირე რაოდენობის არიან, რომელიც იტყვის, რომ ოპოზიციაა, მაგრამ რეალურად არაფერს არ შეცვლის, მაშინ ეს უმნიშვნელო მოვლენა იქნება აბსოლუტურად, თუ ეს ასე არ არის, თუ რაოდენობა იზრდება და თუ მთავრობის უნდობლობას უჭერენ მხარს, პოლიტპატიმრების გათავისუფლებას და ვადამდელ არჩევნებს, ძალიან კარგი, მაშინ გააკეთონ ეგ. ოღონდ ამასთან, ბატონმა გახარიამ უამრავ კითხვას უნდა გასცეს პასუხი და ეს რაღაც ჩრდილში ყოფნა და მოლოდინის რეჟიმის შექმნა, არასერიოზულად გამოიყურება“, – განაცხადა ბოკერიამ.