საპარლამენტო უმრავლესობის წევრის, გურამ მაჭარაშვილის განცხადებით, „ქართულმა ოცნებამ“ ევროპული საბჭოს პრეზიდენტის, შარლ მიშელის ეგიდით შემუშავებულ შეთანხმების დოკუმენტს ხელი უკვე მოაწერა, ახალი ვარიანტის გამოქვეყნება კი საერთოდ არ იყო საჭირო და არც პროცენტებზე ვაჭრობაა მართებული.

„შარლ მიშელის შეთანხმების დოკუმენტს ხელი უკვე მოვაწერეთ. რაც შეეხება ახალ ვარიანტს, ჩვენთვის საერთოდ გაუგებარია, ახალი ვარიანტის შემოთავაზების საფუძველი – რატომ არსებობდა ან რატომ არსებობს. ჩვენი მომეტებული პასუხისმგებლობის ფარგლებში პირველ ვარიანტზე ხელმოწერით დავადასტურეთ, რომ ჩვენი აზროვნება სახელმწიფოებრივია და ახლა ოპოზიციის პასუხს ველოდებით. ჩვენი აზრით, ახალი ვარიანტის შემოთავაზების საფუძველი საერთოდ არ არსებობდა, თუმცა ისიც უნდა აღინიშნოს, რომ ოპოზიცია ხელს არც ამ დოკუმენტს აწერს.

რამდენჯერ უნდა დადასტურდეს, რომ ოპოზიციას არ ადარდებს არც სახელმწიფო და არც საზოგადოება, რომელიც მომხრეა, რომ პოზიცია და ოპოზიციაც პარლამენტში იხილოს. ჩვენ მიგვაჩნია, რომ ახალი ვარიანტი საჭირო საერთოდ არ იყო.

პარტიის თავმჯდომარე ირაკლი კობახიძე საქართველოში არ იმყოფება, პრემიერ-მინისტრი და პარტიის აღმასრულებელი მდივანი თვითიზოლაციაში არიან. ასევე უმრავლესობის რამდენიმე დეპუტატიც თვითიზოლაციაშია, ამის გამო ვერ ხერხდება პოლიტსაბჭოსა და უმრავლესობის შეკრება. ამაზე მეტი კონკრეტული პასუხი, სანამ პოლიტსაბჭოს სხდომა არ იქნება, ვერ გვექნება. ახალ შემოთავაზებაში ძირითადად ახალი არაფერია და მასში ჩამატებულია ჩვენ მიერვე ინიცირებული 40-პროცენტიანი მხარდაჭერის პრინციპი, თუმცა პროცენტებზე ვაჭრობა სწორად არ მიმაჩნია“, – განაცხადა გურამ მაჭარაშვილმა.