ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროში ვაქცინაციის დანერგვის უწყებათაშორისი საკოორდინაციო კომისია გაიმართა.

მხარეებმა ვაქცინების მიმდინარე შესყიდვების პროცესი, იმუნიზაციის პროგრამა და „სინოვაკით“ვაქცინაციის საკითხები განიხილეს. მინისტრის პირველი მოადგილის, თამარ გაბუნიას განცხადებით, საქართველოში „სინოვაკით“ ვაქცინაცია მომავალი კვირიდან დაიწყება.

ჩინური წარმოების „სინოვაკის“ ვაქცინა ტრადიციულ მეთოდზე, ანუ ინაქტივრებული ვირუსის მეთოდოლოგიაზე დამყარებული ვაქცინაა, რომელიც 18 წლის ზემოთ მოსახლეობაში გამოიყენება.

„იმისთვის, რომ ეპიდემიოლოგიური საჭიროებები სწრაფად იქნას მოცული, საჭიროა მოსახლეობას, ასევე ესენციურ ჯგუფებს ჰქონდეთ ვაქცინასთან ხელმისაწვდომობა.„სინოვაკით“ ვაქცინაცია უკვე მომავალი კვირიდან დაიწყება. აღნიშნული ვაცქინით 18 წელს ზემოთ მოქალაქეები აიცრებიან”,– განაცხადა თამარ გაბუნიამ.

შეხვედრაზე მხარეებმა ვაქცინების მიმდინარე შესყიდვების საკითხიც განიხილეს. მინისტრის პირველი მოადგილის განცხადებით, მოსალოდნელია COVAX პლატფორმასთან საქართველომ მოკლე ხანში დაიწყოს მოლაპარაკება „ჯონსონ ენდ ჯონსონისა“ და „ნოვოვაქსის“დოზების მიღებასთან დაკავშირებით.

„ფაიზერის“ დოზების შესახებ არის სერიოზული წინსვლა და ველოდებით დაზუსტებულ ინფორმაციას. მიდის მუშაობა „სინოფარმის“ დამატებითი დოზების მობილიზებაზე. ასევე, გასულ კვირაში საუბარი იყო „ნოვოვაქსის“ და „მოდერნას“ ვაქცინების მობილიზებაზეც. ყველა ეს საჭიროება განხილულია ხარჯთაღრიცხვის კუთხითაც და შესაბამისი გადაწყვეტილება მიღებულია“, - განაცხადა თამარ გაბუნიამ.

18 მაისის მონაცემებით საქართველოში 93 305 აცრაა ჩატარებული.

COVID-19-ის საწინააღმდეგო ვაქცინაცია ინფექციისაგან თავდაცვის ეფექტური და უსაფრთხო საშუალებაა! ჯანმრთელობის მსოფლიო ორგანიზაცია, საზოგადოებრივი ჯანდაცვის უწყებები და კვალიფიციური ექიმები რეკომენდაციას უწევენ COVID-19-ის საწინააღმდეგო ვაქცინაციას.