„რიონის ხეობის მცველებს“ და მათ მხარდამჭერებს თბილისში, ფილარმონიის მიმდებარე ტერიტორია გადაკეტილი აქვთ. ისინი ფილარმონიასთან რესპუბლიკის მოედნიდან საპროტესტო მსვლელობით გაემართნენ.

„ნამახვანჰესის“ მშენებლობის მოწინააღმდეგე ჯგუფის ერთ-ერთმა ორგანიზატორმა, ვარლამ გოლეთიანმა განაცხადა, რომ ხვალიდან აქციის მონაწილეები დედაქალაქიდან რიონის ხეობაში გადაინაცვლებენ და შეეცდებიან ადგილზე გაუწიონ წინააღმდეგობა ჰესის სამშენებლო სამუშაოებს.

„გადავწყვიტეთ, ხვალ ისევ ამ სცენიდან მივმართოთ დედაქალაქის მოსახლეობას და ზოგადად ამ ბრძოლაში ჩართულ ყველა ადამიანს, ამის შემდეგ უკვე ჩვენ დავიძრათ ხეობაში კოლონით აბსოლუტურად თავაწეულებმა და დიდი არგუმენტაციით, რომ მთლიანად გაშიშვლებულია ყველა პროცესი, რასაც ხელისუფლება სჩადის. ამიტომ, მიზანშეწონილად მიგვაჩნია, ხელი შევუშალოთ კომპანიის მუშაობას უშუალოდ რიონის ხეობაში და არ მივცეთ მათ საშუალება, გააგრძელონ ხეობის ნგრევა“, – განაცხადა ვარლამ გოლეთიანმა.