რის საფუძველზე დაიწყო პროკურატურამ მოკვლევა და რატომ იქნა დაბარებული დაკითხვაზე ელისო კილაძე და ლადო ბედუკაძე, ამასთან დაკავშირებით, პროკურატურამ განცხადება გააკეთა.

პროკურატურის პრესსამსახურის ცნობით, მოკვლევა ნინო ჯღარკავას განცხადების საფუძველზე დაიწყო, რომელიც სოციალურ ქსელში მასსა და ბედუკაძეს შორის მიმოწრას ეხება.
"ნინო ჯღარკავამ თბილისის პროკურატურას მიმართა განცხადებით, რომელშიც მიუთითა, რომ "რუსთავის 2"-ით ვრცელდებოდა ინფორმაცია, რომელიც მასსა და ვლადიმერ ბედუკაძეს შორის სოციალური ქსელით განხორციელებულ მიმოწერას ეხებოდა. მისი თქმით, ეს მიმოწერა იყო გაყალბებული. აღნიშნულ ფაქტთან დაკავშირებით, თბილისის პროკურატურაში მიმდინარეობს განცხადებაში მითითებული გარემოებების შესწავლა იმის დასადგენად არსებობს თუ არა დანაშაულის ნიშნები. ამ მიზნით იქნა ბედუკაძე დაბარებული დაკითხვაზე", - ნათქვამია პროკურატურის განცხადებაში.

დაკითხვის დეტალებზე ისაუბრა ელისო კილაძემაც და აღნიშნა, რომ მეორედ მას უკვე ლადო ბედუკაძესთან დაკავშირებით მოუწევს მისვლა პროკურატურაში.

„დაკითხვა ჯღარკავასა და ბედუკაძის მიმოწერას ეხებოდა, რომელიც განსხვავებულ აქცენტებში გამოქვეყნდა. აღნიშნულ საკითხთან დაკავშირებით მე რა შეხება მქონდა, არ ვიცი, იმიტომ, რომ ეს მიმოწერა მე არ მეკუთვნოდა. იმდენად არასერიოზულად ვუყურებ ნინო ჯღარკავას პერსონას, რომ მასთან დაკავშირებულ მიმოწერებს არც ვინახავდი არ მიმაჩნდა, რომ რომელიმე საგაზეთო მასალაში უნდა გამომეყენებინა,“- განაცხადა ელისო კილაძემ.

შეგახსენებთ, რომ ელისო კილაძე და ლადო ბედუკაძე პროკურატურაში, დღეს დაკითხეს.