„გადავდექი სწორედ იმიტომ, რომ პარტია დაშორდა რეალურ პრობლემებს, ჩვენი რიგითი მოქალაქეების რეალურ პრობლემებს, მარტივი მიზეზის გამო - რატომღაც ჩაითვალა, რომ პოლიტიკურ ოპონენტებთან ბრძოლა ბევრად უფრო მნიშვნელოვანია, ვიდრე ჩვენს რიგითი მოქალაქეების ყოვედღიურ პრობლემებზე ზრუნვა“, - განაცხადა ყოფილმა პრემიერ მინისტრმა გიორგი გახარიამ პარტია „საქართველოსთვის“ დამფუძნებელ კონფერენციაზე.

„გადავდექი იმიტომ, რომ, ამას ვამბობ აბსოლუტურად გულწრფელად, 8-წლიანი მმართველობის შემდეგ მმართველი პარტია თავის თუნდაც ყველაზე დიდ მიღწევებს ადარებდა 10-15 წლის წინანდელ რეალობას და ამით განვითარების პერსპექტივას უკლავდა ჩვენს ქვეყანას.

გადავდექი იმიტომ, რომ ერთ კონკრეტულ მომენტში, ჩემთვის სრულიად გასაგებად და აშკარად, პოლიტიკურმა პარტიამ მისი პარტიული ინტერესები დააყენა სახელმწიფო ინტერესებზე მაღლა. ეს იყო რეალური მიზეზი იმ ნაბიჯის, რომელიც მე გადავდგი. მე დღეს აქ ვდგავარ თქვენ წინაშე სრული აღქმით იმ პასუხისმგებლობის, რომელიც მეც მაკისრია ამ რეალობის შექმნაში. რა თქმა უნდა, მე ვარ ნაწილი იმ წარმატების და რაც მთავარია, წარუმატებლობის, რომელიც დღეს ქვეყანაში არსებობს. სწორედ ამ პასუხისმგებლობის გამო ვდგავარ აქ. სწორედ ამ პასუხისმგებლობამ არ მომცა შესაძლებლობა, გავქცეულიყავი. სწორედ ეს პასუხისმგებლობა არის, რამაც მომცა ძალა, ვმდგარიყავი თქვენთან ერთად და მეთქვა – გავერთიანდეთ საქართველოსთვის.

ამასთან ერთად, მინდა, დაგპირდეთ და დაგარწმუნოთ, რომ არ მეშინია არაფერზე საუბრის, რაც გამიკეთებია და რაშიც მონაწილეობა მიმიღია. როგორც აქამდე გამიცია ნებისმიერ კითხვაზე პასუხი, ასე გავაგრძელებთ. იმიტომ, რომ ჩვენი ყველა ნაბიჯის ძირითადი განმსაზღვრელი არგუმენტი და ფაქტორი იყო ფასეულობები ქვეყნის და სახელმწიფოს მსახურება“, - განაცხადა გიორგი გახარიამ და დაამატა, რომ დღეს ქვეყანაში მართლმსაჯულების სისტემა საჭიროებს სერიოზულ რეფორმას.

„დღეს ჩვენ ვერთიანდებით საქართველოსთვის და არა ვინმეს წინააღმდეგ. ჩვენ დღეს გვჭირდება სწრაფი განვითარების გეგმა და თანმიმდევრული გეგმა. ჩვენ ვერთიანდებით სიმართლისთვის და ქმედებისთვის“, - თქვა გახარიამ ახალი პარტიის დამფუძნებელ კონფერენციაზე სიტყვით გამოსვლისას.

მისი შეფასებით, დღეს საქართველოს ყველაზე დიდი გამოწვევა თანამედროვე ინსტიტუტების სისუსტეა, რაც უნდა გამოსწორდეს, რადგან სხვაგვარად, ძლიერი სახელმწიფოს აშენება ვერ მოხერხდება.

„ქვეყანაში, რომელიც აშენებს დემოკრატიას, შეუძლებელია არსებობდეს პრივილეგირებული კლასები“, განაცხადა გახარიამ და დაამატა, რომ სახელმწიფოსთვის დღეს მნიშვნელოვანი გამოწვევაა კორუფცია და ნეპოტიზმი და აუცილებელია მასთან ბრძოლა.