„საქართველოს არ სჭირდება დამატებით დიდი ჰესები და ესაა ჩემი მყარი პოზიცია... ხალხს რკინის ჯებირებით ელაპარაკებიან და საკუთარ სახლში არ უშვებენ იმის გამო, რომ ივანიშვილი მოელაპარაკა და 25%-იან წილში ჩაჯდა. საქართველოს ბიზნესში, მით უმეტეს დიდ ბიზნესში, ჩიტი ვერ გადაიფრენს ივანიშვილის პირდაპირი წილის გარეშე და ეს იცის ყველამ“, - ამის შესახებ საქართველოს ყოფილი პრეზიდენტი მიხეილ სააკაშვილი „ფეისბუქით“ გავრცელებულ ვიდეოში ამბობს.

„მთელი ეს დღეები მესმის, თითქოს სააკაშვილი იყო მომხრე ჰესის აშენების, დიდი ჭკუით არ მოსდის ეს, ვინც ამ ციტატებს ატრიალებს. ეს რომელ წლებში ვიყავი მომხრე?! დიახ, 10-15 წლის წინათ ჰესის აშენების მომხრე ვიყავი, მაგრამ არასდროს ასეთ პროექტს არ დავამტკიცებდი, რომელიც საფრთხეს შეუქმნიდა ქალაქ ქუთაისს ან რიონს გააქრობდა საერთოდ და მილებში მოაქცევდა და ათასგვარ უბედურებას იმიტომ, რომ ამათ ყველაზე უარეს პირობებში გააკეთეს ეს კონტრაქტი გახარიას ხელმოწერით.

15 წლის წინ რაც იყო და რაც არის ახლა, არის ორი სხვადასხვა რეალობა. მაშინ მზისა და ქარის ენერგია გაცილებით ძვირი ღირდა, ვიდრე ჰიდრო და სხვა წყაროები ენერგიის. უამრავი ახალი ტექნოლოგიებია მეგობრებო, არის მწვანე წყალბადის ტექნოლოგია, მაშინ არ იყო ეს. ყველაფერი გაიაფდა და ყველაფერი შეიცვალა.

ასეთი ჰესები უკვე პროგრესული აღარაა, ეპოქა შეიცვალა, დრო შეიცვალა, კონტექსტი შეიცვალა და საქართველოს გარემოებები შეიცვალა. ამიტომ, საქართველოს არ სჭირდება დამატებით დიდი ჰესები და ესაა ჩემი მყარი პოზიცია!

საქართველოს სჭირდება ახლა განვითარება ტურიზმის, სერვისების ექსპორტი, ლოჯისტიკის ექსპორტი, დიდი ქალაქის აშენება შავ ზღვაზე, რომელსაც ჩვენ მოვამარაგებთ დენით, პრობლემა არ გაგვიჩნდება შიდა წყაროების ხარჯზე და ეს ყველაფერი დათვლილი მაქვს მეგავატებში.

ხალხს რკინის ჯებირებით ელაპარაკებიან და საკუთარ სახლში არ უშვებენ იმის გამო, რომ ივანიშვილი მოელაპარაკა და 25%-იან წილში ჩაჯდა - საქართველოს ბიზნესში, მით უმეტეს დიდ ბიზნესში, ჩიტი ვერ გადაიფრენს ივანიშვილის პირდაპირი წილის გარეშე და ეს იცის ყველამ და ამაში ძალიან განვსხვავდებით ჩვენ, იმიტომ, რომ მე ერთი კაპიკი არ წამომიღია საქართველოდან და არც ერთ ბიზნესში არ ვმონაწილეობდი“, - აცხადებს მიხეილ სააკაშვილი.