კარგია, რომ ბოლო პერიოდში, ყოველდღიურად 5 000-მდე ადამიანი იტარებს ვაქცინაციას, მაგრამ სამიზნეს – მოსახლეობის 60%-ის აცრას წლის ბოლომდე რომ მივაღწიოთ, დღეში 20 000-25 000 ადამიანის აცრა მოგვიწევს, - განაცხადა საქართველოს ჯანდაცვის მინისტრის მოადგილემ, თამარ გაბუნიამ და აღნიშნა, რომ ვაქცინების მოწოდების ტენდენციასთან დაკავშირებით იმედისმომცემი სურათია.

„ჩვენ შეთანხმებები გვაქვს სხვადასხვა მომწოდებელთან, რაც ჯამურად ქმნის 3.7 მილიონ დოზას, ეს გვჭირდება მოზრდილი მოსახლეობის 60%-ის ვაქცინაციისთვის. უკვე დაწყებულია მუშაობა მოზარდების ვაქცინაციაზეც და მოგვიწევს ფიქრი იმაზე, რამდენად შევძლებთ მოზარდებზე ვაქცინაციის განვრცობას“, თქვა თამარ გაბუნიამ.

მისივე თქმით, „ფაიზერთან“ მოლაპარაკებების პირველი ეტაპი დასრულებულია.

„ვმუშაობთ მეორე ეტაპზე და მალე გვექნება შესაძლებლობა, საზოგადოებას კონკრეტული დეტალები გავაცნოთ. დავასახელებთ იმ თარიღს, როდის ჩამოვა „ფაიზერის“ მილიონზე მეტი დოზა. ასევე მიდის მუშაობა „სინოფარმთან“, „სინოვაკთან“ დამატებითი დოზების მობილიზაციაზე და კოვაქსის პლატფორმიდან – „ჯონსონ ენდ ჯონსონის“ და „ნოვოვაქსის“. „ნოვოვაქსის“ შემოსვლის პერიოდს სექტემბრიდან ასახელებს კოვაქსის პლატფორმა. ეს არის საკმაოდ დიდი რაოდენობა ვაქცინების, ამისი ადმინისტრირებისთვის განიხილება დამატებითი სამედიცინო დაწესებულებების მობილიზებისა და პროგრამაში ჩართვის საკითხი“, განაცხადა თამარ გაბუნიამ და დაამატა, რომ მოთხოვნის სრულად დაკმაყოფილების მიზნით, ეტაპობრივად დაემატება დაწესებულებები, რომლებიც ვაქცინაციის პროგრამაში ჩაერთვებიან.