თეატრისა და კინოს რეჟისორი, მწერალი, მხატვარი და მოქანდაკე რეზო გაბრიაძე 84 წლის ასაკში გარდაიცვალა.

რეზო გაბრიაძე დაიბადა 1936 წელს ქუთაისში. ის იყო ავტორი 35-ზე მეტი ფილმის სცენარის, მათ შორის: „არაჩვეულებრივი გამოფენა“, „სერენადა“, „არ დაიდარდო“, „ქვევრი“, „ფეოლა“, „შერეკილები“, „მიმინო“ "ხანძარი, "პეპელა","ლიმონის ტორტი", სიყვარული და პომპიერო", "ქინ-ძაძა", და სხვა. იგი 50-ზე მეტი წიგნის ილუსტრაციის ავტორი იყო.

რეზო გაბრიაძემ 1981 წელს თბილისში მარიონეტების თეატრი დააარსა, აქ თავისი პიესების მიხედვით დადგა სპექტაკლები: "კოჯრის ტყის სიზმარები", "ალფრედი და ვიოლეტა", "მარშალ დე ფანტიეს ბრილიანტები", "ჩვენი გაზაფხულის შემოდგომა" და სხვა...

 რეზო გაბრიაძე მრავალი საერთაშორისო ჯილდოს მფლობელია, მათ შორის არის საფრანგეთის რესპუბლიკის ხელოვნებისა და ლიტერატურის კომანდორის ორდენი, სსრკ სახელმწიფო პრემია, პრემიები – „ნიკა“, „ტრიუმფი“, „ოქროს ნიღაბი“, „ოქროს სოფიტი“, „ცარსკოსელსკაია პრემია“, შ. რუსთაველის სახელობის სახელმწიფო პრემია და ა.შ.