„რა ჯანდაბად მინდა თქვენი 1 მანდატი ან 10. გითხარით, რომ ან იქნება უმრავლესობა, 80 მაინც, მანდატები, ან კისრები გიტეხიათ სამუდამოდ“, - განაცხადა „ლეიბორისტული პარტიის“ თავმჯდომარემ, შალვა ნათელაშვილმა ტელეკომპანია „კავკასიას“ პირდაპირ ეთერში, დავით აქუბარდიასთან 9-წლიანი პაუზის შემდეგ სტუმრობისას.

ნათელაშვილი კვლავ ჯიუტად აცხადებს, რომ გაყალბებულ პარლამენტში არ შევა, რადგან „ხალხის ფსიქოლოგიაზე იქნება ეს ძალიან დიდი დარტყმა“.

„ყველა რომ შეყაროს და ყველა რომ დაგვიმორჩილოს [ბიძინა ივანიშვილმა], ხალხის ფსიქოლოგიაზე იქნება ეს ძალიან დიდი დარტყმა, კიდევ უფრო მეტი დეპრესია, უნდობლობა და ხელის ჩაქნევა წავა და რა თქმა უნდა, პოლიტიკოსებზე იფიქრებენ, ამათ არც სიტყვის, არ ფიცის, არაფრის არ სჯერათ. რამდენჯერ ვთქვით, რამდენჯერ გითხარით, არ შევალთ, გაყალბებული პარლამენტია, არ გავუთეთრებთ, არ დავჯდებით იქ, არ გავხდებით თანამონაწილეები დანაშაულის და ახლა, უცბად, იქ მხედავთ პარლამენტის დარბაზში. და მეორეც, მე მინდა ვუთხრა იმ ავყია ცილისმწამებელ ოპონეტებს, რომლებიც ამბობენ, რომ მანდატისთვის იბრძვის ნათელაშვილი, უბრალოდ, თქვენ მიწაც არ უნდა გეღირსოთ, ისეთი ბოროტები ხართ. რა მანდატისთვის ვიბრძვი?! 22-კაციანი ჯგუფი მყავდა პარლამენტში და კიდევ 50-კაციანი, „აღორძინება“ რომ შემოვიერთე, ჯგუფი მყავდა, რა ჯანდაბად მინდა თქვენი 1 მანდატი ან 10. გითხარით, რომ ან იქნება უმრავლესობა, 80 მაინც, მანდატები, ან კისრები გიტეხიათ სამუდამოდ. ამათი მანდატი მინდა მე. რა თქმა უნდა, ჩემს მომხრეებს, უანგაროებს და ეროვნულ ოქროს, ბოდიშს ვუხდი, მათ არ ეხებათ ეს.

ყველაზე კრიტიკულ პერიოდშიც კი, 7-ზე დაბლა არ ჩამოდის ჩვენი რეიტინგი და 1 პროცენტის დაწერა გაბედეს, ხომ წარმოგიდგენიათ. როგორ შეიძლება, ჯერ მარტო შეურაცხყოფა მივაყენო საზოგადოებას, ჩვენს მხარდამჭერებს, 30 წელი რომ მოგვყვებიან, რომ 1 პროცენტი ვაღიარო მე, ამას შევურიგდე და იმ 1 მანდატით, კინკილათი, შევკინკილდე და დავჯდე ალეკო ელისაშვილის და „გირჩის“ გვერდზე. ეს არის საკითხი, რომელიც, რომ იყოს არჩევანი სიკვდილ-სიცოცხლეზე, ავირჩევ სიკვდილს“, განაცხადა შალვა ნათელაშვილმა.