„ერთიანი ნაციონალური მოძრაობის“თავმჯდომარემ ნიკა მელიამ ამერიკის შეერთებულ შტატებში სენატის საგარეო ურთიერთობათა კომიტეტის ევროპის და რეგიონული უსაფრთხოების ქვეკომიტეტის უფროს წევრთან, სენატორ რონ ჯონსონთან, ასევე სენატორების, ჯიმ რიშისა და ჯინ შაჰინის წარმომადგენლებთან შეხვედრის შემდეგ „ამერიკის ხმას“ განუცხადა, რომ სენატში გამართულ ორსაათიან შეხვედრაზე საუბრის ძირითადი თემა პარტიის სამომავლო ხედვები და გეგმები იყო.

„სენატორი ჯონსონი დაინტერესებულია, როგორც კარსმომდგარი არჩევნებით, ასევე რუსეთის გავლენით ჩვენს ქვეყანაში, რეგიონში უსაფრთხოების საკითხებით და იმ სუვერენიტეტისა და დამოუკიდებლობის ხარისხით, რომელიც დღეის მდგომარეობით ქვეყანაში არსებობს. ჩვენ რა თქმა უნდა გვერდს ვერ ავუვლიდით ოლიგარქიულ ხელისუფლებაზე საუბარს და ძალიან სამწუხაროა, რომ ჯერჯერობით, ქართული ოპოზიციის წარმომადგენლებს, რომლებიც ვაშინგტონში ჩამოდიან, უწევთ საუბარი არა მხოლოდ განვითარებაზე, პროგრესზე, არამედ ოლიგარქიულ რეჟიმზე, რომელიც ბედის უკუღმართობით ჩვენს ქვეყანას დაატყდა თავს“, - ამბობს ნიკა მელია.

თუმცა, მისი თქმით, საქართველოს ხელისუფლება შეხვედრის ძირითადი სასაუბრო თემა არ ყოფილა. „მე მას გავაცანი პარტიის, „ნაციონალური მოძრაობის“ სამოქმედო გეგმები და ის ხედვა, რომლითაც მე ვარ აღჭურვილი და ჩემი კონკრეტული ხედვა მომავალ ხელისუფლებასთან დაკავშირებით. მე მიმაჩნია, რომ მომავალი ხელისუფლება, ქვეყნის საკეთილდღეოდ უნდა იყოს ფორმირებული კოალიციური ძალებით, რაც ხელს შეუწყობს ვითარების ნორმალიზებას ქვეყნის შიგნით, განამტკიცებს პოლიტიკურ სტაბილურობას და დარწმუნებული ვარ კოალიციური ხელისუფლების პირობებში, საერთაშორისო თანამეგობრების მხარდაჭერა ერთი ორად გაიზრდება“, - აცხადებს „ამერიკის ხმასთან“ საუბრისას „ენმ“-ის თავმჯდომარე.