“ერთიანი ნაციონალური მოძრაობის“ ლიდერი, დავით ბაქრაძე „რუსთავი-2“-ის ირგვლივ განვითარებულ მოვლენებსა და მედიაში გავრცელებულ ფარულ აუდიოჩანაწერებს გამოეხმაურა.

„რატომ მივიდა ქვეყანა აქამდე, რატომ შეიქმნა ეს დაძაბული ვითარება“ - ამ კითხვებით დაიწყო უმცირესობის ლიდერმა პარტიის ოფისში გამართული ბრიფინგი.

„მთავრობა ცდილობს, რომ ხელში ჩაიგდოს „რუსთავი-2.“ მთავრობა, მოსამართლე ურთმელიძისა და ქიბარ ხალვაშის ხელით, ებრძვის სიტყვის თავისუფლებას. ებრძვის დემოკრატიის ფუნდამენტს. ამ ყველაფერმა კი საზოგადოება სერიოზული დაპირისპირების საფრთხის წინააშე დააყენა. მინდა კატეგორიულად განვაცხადო, ჩვენ არ ვგეგმავდით, არ ვგეგმავთ და არ დავგეგმავთ არანაირ ძალადობას. ჩვენი ბრძოლა არის კანონის და კონსტიტუციის ფარგლებში. ჩვენი ამოცანაა, ეს ხელისუფლება კანონიერად, მშვიდობიანი არჩევნების საშუალებით გავუშვათ სახლში. ჩვენი ამოცანაა, რომ დღეს, საუბარი იყოს არა ბარიკადებზე და გადატრიალებაზე, არამედ გაჩერებულ პენსიებზე, დამდგარ ეკონომიკაზე, მომატებულ სიღარიბეზე. ჩვენ ვიბრძოლებთ კონსტიტუცვიურად, მაგრამ ვიბრძოლებთ ბოლომდე სიტყვის თავისუფლებისა და „რუსთავი-2“-ის თავისუფალი ეთერისთვის“ - აღნიშნა ბაქრაძემ.