დასრულდა თბილისი-საგარეჯო-ბაკურციხის გზის პროექტირება, 85 კმ-იანი მონაკვეთი, 4-ზოლიანი მაგისტრალური გზა, კახეთის ავტომაგისტრალი, რომელიც იქნება ძალიან მნიშვნელოვანი როგორც საავტომობილო გზების ინფრასტრუქტურის განვითარების, ამავდროულად კახეთის რეგიონის განვითარებისთვის, - განაცხადა საქართველოს რეგიონული განვითარებისა და ინფრასტრუქტურის მინისტრმა, ირაკლი ქარსელაძემ მთავრობის სხდომის დასრულების შემდეგ ბრიფინგზე.

„ამ გზის მნიშვნელოვანი მონაკვეთი, სახელმწიფო ბიუჯეტიდან დაფინანსდება და სამ ლოტად დაიყოფა. ანალიზის შედეგად, როგორც საინჟინრო-ტექნიკური, ასევე ფინანსური თვალსაზრისით, შესაძლებელია, რომ პირველ ლოტზე ქართულ კომპანიებს მიეცეთ ტენდერში პირდაპირ მონაწილეობის შესაძლებლობა. ესაა 4 კმ- მდე ოთხზოლიანი ავტომაგისტრალი, რაც ძალიან მნიშვნელოვანია გამოცდილების შეძენის კუთხით და შემდგომში, კიდევ უფრო დიდ ტენდერებში მონაწილეობისათვის. 74 მილიონი ლარია საორიენტაციო ბიუჯეტია მხოლოდ ამ ლოტისთვის და ასეთი ზომის ტენდერი ჩვენ სახელმწიფო შესყიდვით ჯერ არ გამოგვიცხადებია“, – აღნიშნა ირაკლი ქარსელაძემ.

მინისტრის თქმით, დანარჩენი ორი ლოტის ღირებულება 576 მილიონი ლარია და აქ ტენდერები საერთაშორისო საფინანსო ინსტიტუტების წესების დაცვით ჩატარდება, თუმცა ქართულ კომპანიებს ერთობლივი საწარმოების შექმნით შეეძლებათ კონკურსში მონაწილეობა.

„ბაკურციხიდან ჩუმლაყის მიმართულებით, ე.წ. გურჯაანის შემოვლითი გზა დასასრულს უახლოვდება და ძალიან მოხდება მისი ექსპლუატაციაში შეყვანა, რის შედეგედაც ავტოტრანსპორტს, საჭიროების გარეშე, აღარ მოუწევს გავლა ქალაქ გურჯაანსა და მუნიციპალიტეტის ექვს სოფელში, ხოლო გადაადგილების დრო განახევრდება.

ასევე მნიშვნელოვანია, რომ ბაკურციხე-წნორის მიმართულებით ტენდერი უკვე გამოცხადებულია, 16.6კმ-იანი მონაკვეთი, აქაც ახალ გზაზე არის, ახალი გზის მშენებლობაზე საუბარი, რადგან არსებული გზა ვერ აკმაყოფილებს, ვერც პარამეტრალურ და ვერც საგზაო უსაფრთხოების სტანდარტებს. ფაქტობრივად, ორღობეში უწევთ ამ სატვირთო მანქანებს სიარული და ეს გამოსწორდება“, – განაცხადა ირაკლი ქარსელაძემ.