დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, სადღეისოდ საქართველოში ოფიციალურად ინდური შტამის 20 შემთხვევაა დადასტურებული, თუმცა მისი გავრცელება სავარაუდოდ, შესაძლოა 10-15 პროცენტი იყოს, შესაბამისად, სიფრთხილეა საჭირო.

„დღეს ქვეყანაში ოფიციალურად ინდური შტამის 20 შემთხვევა გვაქვს აღრიცხული, იყო 18 და შაბათს დადასტურდა კიდევ ორი. ვვარაუდობთ, რომ 10-15 პროცენტი არის უკვე ეს დელტა ანუ ინდური შტამი ქვეყანაში. შესაბამისად ძალიან ფრთხილად უნდა ვიყოთ და არ გავიმეოროთ იგივე შეცდომა, რაც შარშან იყო, რომ თითქოს ყველამ დავიჯერეთ, დავამარცხეთ კოვიდი და შემდეგ ვნახეთ, რა მოხდა ნოემბერ-დეკემბერში“, - განაცხადა ამირან გამყრელიძემ.

იგი მიიჩნევს, რომ პირბადის ტარება ქვეყანაში ჯერჯერობით სავალდებულო უნდა იყოს.

„ეპიდსიტუაცია ქვეყანაში ძალიან ნელი ტემპით უმჯობესდება, სტაბილიზაცია გვაქვს, თუმცა ეს არის არამდგრადი სტაბილიზაცია, პირველი ნიშანი კი არის ის ფაქტი, რომ ბოლო ერთი კვირის დადებითობის მაჩვენებელმა ოდნავ აიწია. რა თქმა უნდა, ეს არ ნიშნავს, რომ ძალიან უარესდება მდგომარეობა, მაგრამ საყურადღებოა და უნდა ვიყოთ ძალიან ფრთხილად.

რაც შეეხება პირბადეების ტარებაზე რაიმე ტიპის შემსუბუქებას, ჯერჯერობით ამ ვითარებაში პირბადეების სავალდებულო ტარების მოხსნას სწორად არ მივიჩნევ. გადაადგილებაზე დაწესებულ შეზღუდვაზე არ გავაკეთებ კომენტარს, ამ ყველაფერზე თუ საჭიროდ მიიჩნევა, საკოორდინაციო საბჭო იმსჯელებს“, - თქვა ამირან გამყრელიძემ.