GUARDIAN.GE - ათეულობით ადამიანი გარდაიცვალა კანადაში რეკორდულად მაღალი სიცხეების გამო. პოლიციის ცნობით, ვანკუვერის რაიონში 130 ადამიანის მოულოდნელი გარდაცვალების შესახებ მიიღეს ინფორმაცია, მათგან უმეტესობა ასაკოვანი იყო და ჯანმრთელობის პრობლემები გააჩნდათ.

სამშაბათს, კანადაში, ბრიტანული კოლუმბიის პატარა სოფელ ლიტონში, სამი ერთმანეთზე მიყოლებული დღის განმავლობაში, ყველაზე მაღალი ტემპერატურა - 49.5C დაფიქსირდა. ასეთი სიცხე ქვეყანაში მანამდე არასდროს დაუფიქსირებიათ. კვირის დასაწყისამდე, კანადაში ტემპერატურა 45C-ს არასდროს გადაცილებულა.

პოლიციის განცხადებით, ვანკუვერში 65 ადამიანის სიკვდილის მიზეზი სიცხით გამოწვეული პრობლემები გახდა. გარეუბან ბერნებიში სულ მცირე 34 ადამიანის, სარის რაიონში კი 38-ის უეცარი გარდაცვალება აღირიცხა.

„ვანკუვერში არასდროს ყოფილა მსგავსი სიცხე და სამწუხაროა ის ფაქტი, რომ ათეულობით ადამიანი სიცხის გამო კვდება. ჩვენ ყველაფერს ვაკეთებთ ადამიანების უსაფრთხოებისთვის“, განაცხადა პოლიციელმა სტივ ედისონმა და დაამატა, რომ პოლიციის განყოფილებაში, უეცარი გარდაცვალების შესახებ ყოველდღიურად შესული შეტყობინება გასამმაგებული და მეტიცაა.

ვანკუვერიდან დაახლოებით 250 კილომეტრში მდებარე პატარა სოფელ ლიტონის მცხოვრებმა, მეგან ფენდრიხმა თქვა, რომ „თითქმის შეუძლებელია“ გარეთ გასვლა.

„აუტანელი სურათია. ვცდილობთ, რამდენადაც შეგვიძლია, დავრჩეთ სახლში. ჩვენ სიცხეს მიჩვეულები ვართ, და ეს მშრალი სიცხეა, მაგრამ 30 გრადუსი ძალზე განსხვავდება 47-ისაგნ“, - უთხრა მან გაზეთ Globe & Mail-ს.

ბრიტანულ კოლუმბიაში ბევრ სახლს კონდიცირება არ აქვს, რადგან ზაფხულის თვეებში აქ ჩვეულებისამებრ გაცილებით ზომიერი ტემპერატურაა. ვანკუვერსა და მიმდებარედ დროებითი ფანტანები და გამაგრილებელი ცენტრები გაკეთდა.

„ჩვენ მეორე ყველაზე ცივი კლიმატის მქონე და ყველაზე თოვლიანი ქვეყანა ვართ მსოფლიოში. ჩვენ ხშირად ვხედავთ სიცივეებს და ქარბუქებს, მაგრამ ამგვარ სიცხეზე ხშირად არ ვსაუბრობთ... დუბაი უფრო გრილია ახლა, ვიდრე ჩვენ“, განაცხადა კანადის მეტეოროლოგიური ცენტრის კლიმატოლოგმა, დეივიდ ფილიპსმა.