"პატრიოტთა ალიანსის" ერთ-ერთი წარმომადგენელი, თარხან გასვიანი აცხადებს, რომ იორმუღანლოს 42-ე საარჩევნო უბნის ტერიტორიაზე, პოლიციელების თვალწინ, რამდენიმე პირი, მათ შორის, თამარ ხიდაშელის მეუღლე ფიზიკურად გაუსწორდა.

თარხან გასვიანს დაზიანება თავის არეში აქვს მიყენებული. ადგილობრივების ინფორმაციით, გასვიანი გიორგიწმინდის ნომერ მე-20 საარჩევნო უბანთან მომხდარ ინციდენტშიც მონაწილეობდა.

"42-ე უბანზე დაფიქსირდა დარღვევა. მივედით, უკან მოგვყვებოდა დაახლოებით, 5 ავტომობილი, მათ შორის, კრიმინალური პოლიციის "შკოდისა" და პოლიციის "პიკაპის" ტიპის ავტომობილები. უბანში შევედით, რათა გაგვრკვია, რა სახის პრობლემა იყო.

ავტომობილებიდან გადმოვიდა დაახლოებით, 25 კაცი, მათ შორის, სავარაუდოდ, რამდენიმე მოჭიდავე. აქვე იყო თამარ ხიდაშელის ქმარი, პოლიციელები და მათი მეგობრები. მოთათბირების შემდეგ, მუშტების ქნევითა და სიტყვიერი შეურაცხყოფით ჩვენსკენ წამოვიდნენ. ჩვენ 6 ვიყავით, 25 კაცს ვერ მოვერეოდით, მაგრამ რაც შეგვეძლო შესაბამისი პასუხი გავეცით.

დაახლოებით, 20 წუთის განმავლოვბაში გრძელდებოდა შეხლა-შემოხლა და ჩვენი ფიზიკური შეურაცხყოფა. ამ დროს გამოვიდნენ "ობიექტივის" თანამშრომლები, მათი დანახვისთანავე ჩასხდნენ მანქანებში და წავიდნენ. ჩვენ მოვასწარით მათი ავტომობილების ნომრების გადაღება.

ამის შემდეგ მოგვიახლოვდნენ პოლიციელები, რომლებიც შორიდან გვიყურებდნენ. მომიახლოვდა საგარეჯოს პოლიციიის უფროსი ლევან მაისურაძე და მეკითხება, რა მოხდაო. მე მას ვუთხარი, რომ ყველაფერს თავად ხედავდა და ის იყო სამართალდამრღვევი", - განაცხადა თარხან გასვიანმა.

მისივე თქმით, მთავარ პროკურატურაში იგი მომხდარ ინციდენტთან დაკავშირებით განცხადებას დღესვე შეიტანს.