იუსტიციის სამინისტროში, დღეს, საპროკურორო საბჭოს პირველი სხდომა გაიმართა.

სხდომის დასრულების შემდეგ, ჟურნალისტებს იუსტიციის მინისტრმა, თეა წულუკიანმა განუცხადა, საპროკურორო საბჭოში არის 8 პროკურორი, 2 მოსამართლე, 1 ადვოკატი, 1 აკადემიური წრეებიდან წარმომადგენელი და 1 დეპუტატი.

იუსტიციის მინისტრის განმარტებით, ამ საბჭოს ფუნქცია არ არის რომელიმე საქმეზე გამოძიების ჩატარება ან პროკურატურის ორგანოებისთვის მითითება, ესა თუ ის საქმე როგორ გამოიძიოს.

მისივე განმარტებით, ამ საბჭოს აქვს უფლება, შეარჩიოს მთავარი პროკურორობის კანდიდატი.

"დღეისათვის შემოსულია 3 კანდიდატურა. ესენია: კახი კახიშვილის, ირაკლი შოთაძის და პაატა შავაძის. კახი კახიშვილმა მოხსნა კანდიდატურა და აქედან გამომდინარე, სამწუხაროდ, მე მის შეყვანას სამკაციან სიაში ვეღარ შევძლებ. კონსულტაციები, იუსტიციის მინისტრსა და აკადემიურ წრეებს, არასამთავრობოებს შორის გაგრძელდება 13 ნოემბრამდე. 19 ნოემბერს, 11 საათზე საბჭო ისევ შეიკრიბება, სამი პირისგან შემდგარ სიას განიხილავს, უყრის კენჭს და რომელი კანდიდატურაც მიიღებს უფრო მეტ ხმას, ის იქნება წარდგენილი მთავრობის წინაშე. ჩვენ შევთანხმდით იმ თავისებურებებზე, როგორ უნდა ჩატარდეს კენჭისყრა 19 ნოემბრის სხდომაზე, ჩვენ უნდა გვქონდეს ბიულეტენები, ყუთი, დამკვირვებლებსაც მოვიწვევთ ვისაც სურვილი ექნება, მათ შორის, მედიას და 19 ნოემბრის შემდეგ მე უკვე შევძლებ, რომ გამარჯვებული კანდიდატი წარვუდგინო მთავრობას, რომელიც თავის მხრივ, ამ კანდიდატს ასარჩევად გადააგზავნის პარლამენტში", - განაცხადა თეა წულუკიანმა.

რაც შეეხება იმას, რომ კანდიდატებს შორის უნდა იყოს ერთ-ერთი განსხვავებული სქესის წარმომადგენელი, წულუკიანის განცხადებით, ჯერჯერობით ქალი კანდიდატურა არ შესულა და თუ ეს ასე იქნება ბოლომდე, მაშინ იუსტიციის მინისტრს მოუწევს შეარჩიოს ქალი-კანდიდატი და შეიყვანოს სამკაციან სიაში.