GUARDIAN.GE - ოქსფორდის უნივერსიტეტის მეცნიერები და ლუდვიგის კიბოს კვლევის ინსტიტუტის მკვლევარები წარმატების გზაზე არიან დაამტკიცონ, რომ SARS-CoV-2 წინააღმდეგ ოქსფორდ-ასტრაზენეკას ვაქცინის მიღმა არსებულ ტექნოლოგიას კიბოს მკურნალობის პოტენციალი გააჩნია - საუბარია ახალი ვაქცინის განვითარებაზე, რომელიც კიბოს უმკურნალებს.

სტატია ამის შესახებ ოქსფორდის უნივერსიტეტის ვებგვერდზე გამოქვეყნდა და მის თარგმანს GUARDIAN.GE გთავაზობთ.

როგორც სტატიაშია აღნიშნული, მკველვარებმა, ოქსფორდის ვირუსული ინფექციის გადამტანი ტექნოლოგიის გამოყენებით, ორი დოზის თერაპიული კიბოს ვაქცინა შეიმუშავეს.

როდესაც მისი გამოცდა თაგვის სიმსივნურ მოდელებში მოხდა, კიბოს ვაქცინამ სიმსივნის საწინააღმდეგო  T უჯრედების დონე გაზარდა, შეაღწია სიმსივნურ წარმონაქმნებში და გააუმჯობესა კიბოს იმუნოთერაპიის ქმედითობა. მხოლოდ იმუნოთერაპიასთან შედარებით, ვაქცინასთან კომბინაციამ აჩვენა სიმსივნის ზომის უფრო დიდი შემცირება და გააუმჯობესა თაგვების გადარჩენა.

კვლევა, რომელიც ლუდვიგის კიბოს კვლევის ინსტიტუტის წევრის, ოქსფორდის უნივერსიტეტის პროფესორის, ბენოიტ ვან დენ ეინდის ჯგუფის, ოქსფორდის უნივერსიტეტის პროფესორის, ადრიან ჰილისა და ამავე უნივერსიტეტის ჯენერის ინსტიტუტის დოქტორ ირინა რედჩენკოს თანამშრომლობით ჩატარდა, „კიბოს იმუნოთერაპიის ჟურნალში“ (the Journal for ImmunoTherapy of Cancer) გამოქვეყნდა.

კიბოს იმუნოთერაპიამ - პაციენტის იმუნური სისტემის სიმსივნის წინააღმდეგ შემობრუნებამ - კიბოთი დაავადებული პაციენტების ერთ ნაწილში შედეგების მნიშვნელოვანი გაუმჯობესება გამოიწვია. Anti-PD-1 იმუნოთერაპია სიმსივნის საწინააღმდეგო T უჯრედების მუხრუჭების ამოღებით მუშაობს, რათა მათ კიბოს უჯრედების მოკვლის საშუალება მიეცეთ. თუმცა, ამ წარმატების მიუხედავად, ანტი PD-1 თერაპია არაეფექტურია კიბოს პაციენტთა უმრავლესობაში.

კიბოს საწინააღმდეგო PD-1 თერაპიის დაბალი ეფექტურობის ერთ-ერთი მიზეზი ის არის, რომ ზოგიერთ პაციენტს სიმსივნის საწინააღმდეგო T უჯრედების დაბალი დონე აქვს. ოქსფორდის ვაქცინის ტექნოლოგია, რომელიც მსოფლიოში ცნობილი Oxford-AstraZeneca COVID-19 ვაქცინის შესაქმნელად გამოიყენეს, CD8+ T უჯრედების ძლიერ პასუხებს წარმოქმნის, რაც ანტი-სიმსივნის კარგი შედეგებისთვის არის საჭირო.

მეცნიერების გუნდმა კიბოს ორი დოზის თერაპიული ვაქცინა განსხვავებული ვირუსული ვექტორებით განავითარა, რომელთაგან ერთი იგივეა, რაც ოქსფორდ-ასტრაზენეკას COVID-19 ვაქცინის ვექტორი. ვაქცინის მკურნალობის შესაქმნელად, რომლის სამიზნეც კონკრეტულად კიბოს უჯრედებია, ვაქცინა შეიქმნა ორი MAGE ტიპის ცილის სამიზნეზე, რომლებიც მრავალი სახის კიბოს უჯრედების ზედაპირზეა. ეს ორი სამიზნე - სახელწოდებით, MAGE-A3 და NY-ESO-1 - ადრე დადასტურებული იყო ლუდვიგის ინსტიტუტის მიერ.

თაგვის სიმსივნის მოდელების პრეკლინიკურმა ექსპერიმენტებმა აჩვენა, რომ კიბოს ვაქცინამ გაზარდა სიმსივნის ინფილტრაციული CD8+ T უჯრედების დონე და გააძლიერა ანტი-PD-1 იმუნოთერაპიაზე პასუხი. მხოლოდ ანტი-PD-1 თერაპიასთან შედარებით, კომბინირებულმა ვაქცინამ და ანტი-PD-1 მკურნალობამ გამოიწვია სიმსივნის ზომის უფრო დიდი შემცირება და გააუმჯობესა თაგვების გადარჩენა.

„ოქსფორდის უნივერსიტეტის“ სიმსივნის იმუნოლოგიის პროფესორის, „ლუდვიგის კიბოს კვლევის ინსტიტუტის“ წევრისა და ბელგიის „დე დუვეს“ ინსტიტუტის დირექტორის ბენოიტ ვან დენ ეინდის განცხადებით, მათ წინა კველევიდან იცოდნენ, რომ MAGE-ს ტიპის პროტეინები, კიბოს უჯრედების ზედაპირზე, მოქმედებენ, როგორც წითელი დროშები, რათა მიიზიდონ იმუნური უჯრედები, რომლებიც ანადგურებენ სიმსივნეებს.

მისი თქმით, MAGE ცილებს აქვთ უპირატესობა კიბოს სხვა ანტიგენებთან შედარებით.

„რაც მთავარია სამიზნე სპეციფიკისთვის, MAGE-ს ტიპის ანტიგენები არ არიან წარმოდგენილი ნორმალური ქსოვილების ზედაპირზე, რაც ამცირებს გვერდითი ეფექტების რისკს, რომელიც იმუნური სისტემის მიერ ჯანსაღ უჯრედებზე თავდასხმის შედეგად არის გამოწვეული“, - განაცხადა პროფესორმა.

კიბოს ვაქცინის ფაზის 1/2 ა კლინიკური ცდა ანტი-PD-1 იმუნოთერაპიასთან ერთად, ფილტვის მცირე უჯრედული კიბოს 80 პაციენტში ამ წლის ბოლოს დაიწყება.

ადრიან ჰილი, ლაქშმი მიტალი და ოჯახის ვაქცინოლოგიის პროფესორი და ოქსფორდის უნივერსიტეტის ჯენერის ინსტიტუტის დირექტორი, ამბობენ, რომ ამ ახალი ვაქცინის პლატფორმას კიბოს მკურნალობაში რევოლუციის მოხდენის პოტენციალი აქვს. მცირე უჯრედული ფილტვის კიბოს მოახლოებული ცდა პროსტატის სიმსივნის დროს გამოყენებული კიბოს მსგავსი ვაქცინის ცდის 2ა ფაზას მოჰყვება, რომელიც ოქსფორდის უნივერსიტეტის მიერ განხორციელდა და დამაიმედებელ შედეგებს აჩვენებს.

„კიბოს საწინააღმდეგო ჩვენი ვაქცინები ავლენენ CD8+ T უჯრედის ძლიერ პასუხებს, რომლებიც აღწევენ სიმსივნეებში და აჩვენებენ დიდ პოტენციალს იმუნური საკონტროლო-გამშვები პუნქტის დაბლოკვის თერაპიის გაძლიერების კუთხით და აუმჯობესებენ შედეგებს კიბოს მქონე პაციენტებში“, - აცხადებენ მეცნიერები.